नवीन सेवार्थ प्रणालीचे कामकाज पूर्ण करण्यासाठी सर्व कोषागार कार्यालय सुट्टीच्या दिवशीही सुरु

 

         गोंदिया, दि.14 : वेतनाची प्रक्रिया अधिक वेगवान आणि सुरक्षित करण्यासाठी शासनाकडून वित्त विभागाचे दि.1 जुलै 2026 चे शासन निर्णयानुसार नवीन सेवार्थ प्रणाली लागु केली आहे. या नवीन सेवार्थ प्रणालीच्या यशस्वी अंमलबजावणीसाठी जुन्या सेवार्थ प्रणालीमधील सर्व कर्मचाऱ्यांची माहिती आणि सेवा तपशील नवीन पोर्टलवर स्थलांतरित (Data Migration) करण्याची प्रक्रिया सध्या कोषागार कार्यालय स्तरावर युद्ध पातळीवर सुरु असून विभागातील सर्व आहरण व संवितरण अधिकाऱ्यांना जुन्या सेवार्थ प्रणालीमध्ये कोणतेही नवीन कामकाज किंवा बील निर्मिती दि.20 ऑगस्ट 2026 नंतर करता येणार नाही.

          गोंदिया जिल्हयातील सर्व आहरण व संवितरण अधिकारी, कार्यालय प्रमुख आणि कर्मचारी यांनी याची गांभिर्यानी नोंद घ्यावी व Data Migration ची प्रक्रिया आणि नवीन सेवार्थ प्रणालीमध्ये माहे जुलै 2026 चे वेतन देयक तयार करणे (Pilot Bill Generate) इत्यादी कामकाज दि.20 ऑगस्ट 2026 पूर्वी पूर्ण करावे. याबाबत कोणालाही मुदतवाढ मिळणार नाही असे संचालनालय, लेखा व कोषागारे, मुंबई यांनी निर्देश दिले आहे.

          तरी सर्व आहरण व संवितरण अधिकारी यांनी नवीन सेवार्थ प्रणाली मध्ये Data Migration व Pilot देयक तयार करण्याबाबत विहीत कालावधीत कामकाज पूर्ण करण्याबाबत कोषागारास सहकार्य करावे. सदर कामकाज विहित कालावधीत पूर्ण करण्याकरिता सर्व कोषागार/उपकोषागार कार्यालय सुट्टीच्या दिवशी सुरु राहतील, असे जिल्हा कोषागार अधिकारी तौसीफ हसीन यांनी कळविले आहे.

                                                                        00000000