21 ऑगस्टला ‘महा वॉकेथॉन’मध्ये सर्वांनी सहभागी व्हावे : जिल्हाधिकारी मंदार पत्की यांचे आवाहन

 

        गोंदिया, दि.18 : महाराष्ट्र शासनाने स्व. सुधाकरराव नाईक यांच्या जयंती निमित्त दि.15 ऑगस्ट ते 21 ऑगस्ट 2026 हा “जलसंधारण सप्ताह” म्हणून साजरा करण्याचे ठरविले आहे. यामध्ये 21 ऑगस्ट रोजी ‘महा वॉकेथॉन-वॉक फॉर वॉटर’ (Maha Walkathon-Walk for Water) ही संकल्पना आयोजित केलेली आहे.

         गोंदिया जिल्हा हा जलसंधारणाच्या दृष्टीकोनातून अत्यंत महत्वाचा जिल्हा आहे. या सप्ताहामध्ये दि.21 ऑगस्ट रोजी “महा वॉकेथॉन” उपक्रम संपूर्ण जिल्हाभर आयोजित करण्यात येत आहे. या उपक्रमात जिल्ह्यातील सर्व युवकांनी सहभागी होण्याचे आवाहन जिल्हाधिकारी मंदार पत्की यांनी केले आहे.

        या उपक्रमात सर्व युवकांसाठी ‘पाणी आणि जलसंधारण’ यावरील रील स्पर्धा घेण्यात येत आहे. त्यासाठी सर्व युवकांनी या स्पर्धेत सहभागी होण्यासाठी नोंदणी करणे आवश्यक आहे. त्याचप्रमाणे गोंदिया येथील जयस्तंभ चौक ते फुलचूर तलाव पर्यंत “महा वॉकेथॉन”चे आयोजन करण्यात आलेले आहे.

        दरम्यान, महा वॉकेथॉनची नोंदणी दि.21 ऑगस्ट रोजी सकाळी 5.30 ते 6.30 पर्यंत होणार आहे. सकाळील 6.45 वाजता जलसंधारणाची शपथ घेण्यात येईल. जयस्तंभ चौक, गोंदिया येथून सकाळी 7.00 वाजता मान्यवरांमार्फत हिरवी झेंडी दाखवून महा वॉकेथॉनचा शुभारंभ करण्यात येणार आहे. सकाळी 8.00 वाजता शिवधाम (फुलचूर तलाव) येथे महा वॉकेथॉन समाप्त होणार आहे. सकाळी 8.30 वाजता जलपूजन व दीप पूजन होईल. त्यानंतर पुरस्कार वितरण व कार्यक्रमाची सांगता करण्यात येईल.

         महा वॉकेथॉन हे दि.21 ऑगस्ट रोजी सकाळी 6.30 वाजता सुरु होणार आहे. यामध्ये शासनाच्या तसेच विविध स्तरावरील नागरिकांचा सहभाग असणार आहे, जेणेकरुन गोंदिया जिल्ह्यात जलसंपदेचे आणि मृदसंपदेचे जतन करण्यास मदत होणार असून नागरिकांमध्ये जागृती करण्यासाठी मदत होणार आहे.

        या वॉकेथॉनमध्ये सर्व अधिकारी व कर्मचारी यांनी उत्स्फुर्तपणे सहभागी व्हावे. वॉकेथॉनमध्ये सहभागी होण्यासाठी https://register.mahaevent.co.in/#/register या संकेतस्थळाला भेट द्यावी व आपली नोंदणी करुन ई-प्रमाणपत्र प्राप्त करुन घ्यावे.

        चला… आपल्या आरोग्यासाठी एक पाऊल पुढे टाकूया! माती वाचवा, पाणी जपा, सुरक्षित भविष्य घडवूया.

        तरी गोंदिया जिल्ह्यातील सर्व युवकांनी या “महा वॉकेथॉन”मध्ये उत्स्फुर्तपणे सहभाग नोंदवून शासनाच्या या जलसंधारण सप्ताहाला यशस्वी करावे, असे आवाहन जिल्हाधिकारी मंदार पत्की यांनी केले आहे.

                                                     0000000