गोंदियात
मुद्रा योजना मेळावा व उत्कर्षची सभा
|
बेरोजगार युवक-युवती आणि गरजू
व्यक्तींना उद्योग व्यवसाय सुरु करुन स्वावलंबी बनविण्यासाठी त्वरित कर्ज देण्याची
सुविधा प्रधानमंत्री मुद्रा बँक योजनेच्या माध्यमातून उपलब्ध झाली आहे.
जिल्ह्यातील जास्तीत जास्त व्यक्तींना रोजगार उभारुन स्वावलंबी करण्यासाठी बँकांनी
मुद्रा बँक योजना प्रभावीपणे राबवावी. असे प्रतिपादन राज्य लोकलेखा समितीचे
अध्यक्ष आमदार गोपालदास अग्रवाल यांनी केले.
आज 16 जून रोजी गोंदिया येथील जैन कुशल
सभागृहात महिला आर्थिक विकास महामंडळाचे जिल्हा कार्यालय व जिल्हा माहिती कार्यालय
यांच्या संयुक्त वतीने आयोजित प्रधानमंत्री मुद्रा योजना कौशल्य विकास, रोजगार व
उद्योजकता मार्गदर्शन मेळावा व उत्कर्ष लोकसंचालित साधन केंद्र गोंदियाच्या
वार्षिक सर्वसाधारण सभेचे उदघाटक म्हणून आमदार अग्रवाल बोलत होते. अध्यक्षस्थानी
जि.प.अध्यक्ष उषा मेंढे हया होत्या. प्रमुख अतिथी म्हणून निवासी उपजिल्हाधिकारी
प्रविण महिरे, अर्जुनी/मोरगावच्या उपविभागीय अधिकारी वर्षा लांडगे, लेखा अधिकारी
श्री.बावीसकर, प्रभारी जिल्हा समाजकल्याण अधिकारी मिलींद रामटेके, उत्कर्ष
लोकसंचालित साधन केंद्राच्या अध्यक्ष दिपाली वैद्य, तर प्रमुख मार्गदर्शक म्हणून
जिल्हा अग्रणी प्रबंधक अनिल श्रीवास्तव, सहायक रोजगार व कौशल्य विकास मार्गदर्शन
अधिकारी सुरेश गणराज, उद्योग निरिक्षक श्री.राठोड, स्टार स्वरोजगार प्रशिक्षण
संस्थेच्या आर्थिक साक्षरता कक्षाचे व्यवस्थापक श्री.पहिरे, सामाजिक कार्यकर्त्या
सविता बेदरकर यांची उपस्थिती होती.
आ.अग्रवाल म्हणाले, सावित्रीबाई फुलेमुळे
महिलांच्या सशक्तीकरणाला गती मिळाली. अलिकडच्या 10 ते 15 वर्षात बचतगटाच्या
माध्यमातून महिलांच्या आर्थिक विकासाला चालना मिळाली आहे. महिला आर्थिक विकास
महामंडळाच्या माध्यमातून जिल्ह्यात बचतगटाचे चांगले काम मोठ्या प्रमाणात सुरु आहे.
गोंदिया तालुक्यात माविमकडे कमी गावे असल्यामुळे बचतगटांची संख्या कमी आहे.
जिल्ह्यात माविमचे काम चांगल्याप्रकारे सुरु असल्यामुळे जिल्ह्यातील सर्व
बचतगटांचे काम माविमकडे असले पाहिजे. माविमच्या माध्यमातून नियोजनपूर्ण कामे
करण्यात येत असून महिलांना आर्थिकदृष्ट्या सक्षम करण्याचे काम मोठ्या प्रमाणात
करण्यात येत आहे. बचतगटाची चळवळ जिल्ह्यात आर्थिकदृष्ट्या सक्षम करायची असेल तर
माविमचा व्याप वाढविणे गरजेचे असल्याचे त्यांनी सांगितले.
मागील दोन वर्षात मुद्रा बँक योजनेच्या
माध्यमातून जिल्ह्यात 123 कोटी रुपये कर्ज रोजगार निर्मितीसाठी उपलब्ध करुन
देण्यात आल्याचे सांगून श्री.अग्रवाल पुढे म्हणाले, यापूर्वी कोणत्याही
राष्ट्रीयकृत बँकांनी रोजगार निर्मितीसाठी एवढ्या मोठ्या प्रमाणात कर्ज उपलब्ध
करुन दिलेले नाही. गोंदियात बचतगटांच्या उत्पादित वस्तूंची विक्री करण्यासाठी जयस्तंभ
चौकातील वन विभागाच्या जागेवर मॉल उभारण्यासाठी आपण प्रयत्नशील आहोत. ही वन
विभागाची जागा माविमला मिळाली पाहिजे यासाठी आपला आग्रह राहणार आहे. या जागेवर
हॉल, शॉपींग, कॉम्पलेक्स व माविमचे कार्यालय अशी एक चांगली वास्तू बनविण्यासाठी निश्चितच
पुढाकार घेण्यात येईल. बचतगटाच्या महिलांना योग्य मार्गदर्शन करण्याचे काम माविम करीत
असल्यामुळे त्यांच्या आर्थिक सक्षमीकरणाला गती मिळाल्याचे त्यांनी सांगितले.
श्रीमती मेंढे म्हणाल्या, केंद्र व राज्य
शासनाच्या विविध योजना जिल्ह्यात राबविण्यात येतात. त्या विविध योजनांची
अंमलबजावणी जिल्हा परिषदेमार्फत करण्यात येते. बचतगटातील महिलांना वैयक्तीकरित्या
सक्षम करण्यासाठी केंद्र सरकारची प्रधानमंत्री मुद्रा योजना अत्यंत महत्वाची आहे.
या योजनेच्या माध्यमातून 50 हजार ते 10 लक्ष रुपयापर्यंतची सुविधा उपलब्ध करुन
देण्यात आलेली आहे. या कर्ज सुविधेचा लाभ बचतगटातील महिलांना मिळाला पाहिजे.
बचतगटामुळे महिला आता सक्षम झाल्या आहेत.
शासनाच्या विविध कार्यालयाच्या इमारतील
बचतगटाच्या उत्पादित वस्तूंना विक्री केंद्र उपलब्ध झाले पाहिजे असे सांगून
श्रीमती मेंढे म्हणाल्या, ग्रामीण भागातील महिलांनी दुग्ध व्यवसायाला देखील मोठ्या
प्रमाणात सुरु करण्याची आवश्यकता आहे. त्यामुळे कुटूंबाची आर्थिक स्थिती
सुधारण्यास मदत होईल. बचतगटाने उत्पादित केलेली वस्तू ही चांगल्या दर्जाची कशी
असेल याकडे लक्ष दिले पाहिजे. बचतगटातील महिलांना जिल्हा परिषदेच्या माध्यमातून
जास्तीत जास्त मदत कशी करता येईल यासाठी आपण प्रयत्नशील असून माविमच्या
मार्गदर्शनामुळे ग्रामीण महिलांच्या प्रगतीला दिशा मिळाली असल्याचे त्यांनी
सांगितले.
श्री.महिरे
म्हणाले, बचतगटामुळे महिलांच्या सक्षमीकरणाला सुरुवात झाली आहे. प्रधानमंत्री
मुद्रा योजनेच्या माध्यमातून बचतगटातील महिलांना वैयक्तीक कर्ज उपलब्ध होण्यास मदत
होणार आहे. बचतगटातील महिलांना शासकीय इमारतीत खाणावळ तसेच कॅन्टीन सुरु
करण्यासाठी शासकीय जागा उपलब्ध करुन देण्यास आपण प्रयत्नशील आहोत. बचतगटातील महिला
ज्या वस्तू व साहित्याची निर्मिती करतात त्याची गुणवत्ता ही उत्तमच असते. त्यामुळे
त्यांना चांगला पैसा मिळण्यास मदत होते. माविमने बचतगटातील महिलांच्या प्रगतीच्या
दृष्टीने आणखी जोमाने काम करावे असेही ते यावेळी म्हणाले.
मार्गदर्शक
म्हणून बोलतांना श्री.श्रीवास्तव म्हणाले, मुद्रा बँक योजनेच्या माध्यमातून तीन
गटात कर्ज उपलब्ध करुन दिल्या जाते. जी गरजू व्यक्ती आहे, ज्याला उद्योग व्यवसाय
सुरु करण्याची आवड आहे त्याने या योजनेचा लाभ घेतला पाहिजे. बँकांकडून मुद्रा
योजनेसाठी कर्ज मागण्यास येणाऱ्या व्यक्तींना योग्य ते मार्गदर्शन व कर्ज उपलब्ध
करुन देण्यासाठी सहकार्य करण्यात येईल. कोणतीही बँक मुद्दामहून कर्ज देण्यास
टाळाटाळ करीत असेल तर त्यावर निश्चित कार्यवाही करण्यात येईल. आवश्यक ती कागदपत्रे
बँकांकडे कर्ज मागणाऱ्या व्यक्तींनी सादर करावी. काही तक्रारी व अडचणी असल्यास
आपल्याशी संपर्क साधावा, असे ते यावेळी म्हणाले.
श्री.गणराज यांनी कौशल्य विकासासोबतच
प्रमोद महाजन कौशल्य विकास व उद्योजकता अभियानाबाबत उपस्थित महिलांना माहिती दिली.
जिल्हा उद्योग केंद्राचे उद्योग निरिक्षक श्री.राठोड यांनी पंतप्रधान रोजगार
निर्मिती कार्यक्रमासह उद्योग केंद्राच्या विविध योजनांविषयी विस्तृत माहिती दिली.
तसेच स्टार स्वरोजगार प्रशिक्षण केंद्राच्या आर्थिक साक्षरता कक्षाचे व्यवस्थापक
श्री.पहिरे यांनी सुध्दा विस्तृत माहिती दिली. सामाजिक कार्यकर्त्या सविता बेदरकर
यांनी उपस्थित महिलांचे व्यसनमुक्ती, अंधश्रध्दा, डॉ.बाबासाहेब आंबेडकर यांचे
विचार, लेक वाचवा, हुंडाबंदी या विषयावर सविस्तर प्रबोधन केले.
यावेळी मान्यवरांच्या हस्ते उत्कृष्ट
ग्रामसंस्था म्हणून झाशीची राणी ग्रामसंस्था पिंडकेपार, सर्वात जास्त 10 लक्ष 50
हजार कर्ज घेणाऱ्या बाघोली येथील महेश्वरी महिला बचतगट, 8 लक्ष रुपये कर्ज घेणारा
अंभोरा येथील सावित्री महिला बचतगट, उत्तम पशुसखी म्हणून डव्वा येथील सुनिता
ठाकरे, उत्कृष्ट सहयोगिनी म्हणून सुनिता कटरे, कुंजलता भुरकुडे, उत्कृष्ट इंटरनेट
साथी म्हणून गिता भोयर, उत्कृष्ट उद्योजक म्हणून एकोडी येथील गुल महिला बचतगट, उत्कृष्ट
महिला उद्योजक म्हणून राणु वर्मा यांचा सन्मानचिन्ह व पुष्पगुच्छ देवून सत्कार
करण्यात आला.
प्रधानमंत्री मुद्रा योजनेतील शिशु गटातून
बँक ऑफ महाराष्ट्रच्या वतीने चिचगाव येथील सरिता रहांगडाले यांना शिवणकामासाठी 45
हजार रुपये कर्जाचे मंजूरीपत्र, स्टेट बँक ऑफ इंडियाच्या वतीने गोंदिया येथील
हितेंद्र राहूलकर यांना किशोर गटातून 1 लक्ष रुपये कर्जाचे मंजूरीपत्र, गोरेगाव
येथील दिगंबर बंसोड याला किशोर गटातून 1 लक्ष 20 हजार रुपये दुग्ध व्यवसायासाठी
कर्जाचे मंजूरीपत्र, कामठा येथील बँक ऑफ इंडिया शाखेच्या वतीने 3 लाभार्थ्यांना शिशु
गटातून कर्जाचे मंजूरीपत्र मान्यवरांचे हस्ते देण्यात आले.
यावेळी
बँक ऑफ महाराष्ट्रच्या करुणा आगडे, बँक ऑफ बडोदाचे नितीन मौदेकर, स्टेट बँक ऑफ
इंडियाचे तरुण चॅटर्जी, बँक ऑफ इंडियाचे एस.पी.त्रिवेदी, कॅनरा बँकेचे
श्री.रमणकुमार यांचीही मंचावर उपस्थिती होती. यावेळी अलका रंगारी, रामू वर्मा,
अनिता बडगे, निशा ठवकर या बचतगटातील महिलांनी आपण करीत असलेल्या उद्योगाबाबतची
माहिती दिली.
उत्कर्ष
लोकसंचालित साधन केंद्राची सर्वसाधारण सभा यावेळी संपन्न झाली. व्यवस्थापक मोनिता
चौधरी यांनी अहवालाचे वाचन केले. अध्यक्ष दिपाली वैद्य, सचिव तुलसी चौधरी
यांच्यासह केंद्राचे पदाधिकारी उपस्थित होते. उत्कर्ष लोकसंचालित साधन केंद्राच्या
वेध उत्कर्षाचा सन 2016-17 च्या वार्षिक अहवालाचे प्रकाशन पाहुण्यांच्या हस्ते
करण्यात आले. बचतगटातील उत्पादित मालाच्या विक्रीचे तसेच जिल्हा उद्योग केंद्र,
बँक ऑफ इंडिया, जिल्हा कौशल्य व रोजगार मार्गदर्शन केंद्र यांच्या विविध योजनांची
माहिती देणारे तसेच जिल्हा माहिती कार्यालयाचा लोकराज्य स्टॉल लावण्यात आला होता.
प्रारंभी मान्यवरांच्या हस्ते दीप प्रज्वलीत करुन सावित्रीबाई फुले यांच्या
प्रतिमेचे पूजन करण्यात आले.
कार्यक्रमाच्या
यशस्वीतेसाठी माविमचे सहायक जिल्हा समन्वय अधिकारी सतीश मार्कंड, सहायक सनियंत्रण
अधिकारी प्रदिप कुकडकर, लेखाधिकारी योगेश वैरागडे, प्रियंका मुंजे, नामदेव बांगरे,
सुशील पंचभाई, प्रफुल्ल अवघड, एकांत वरधने, केंद्राचे व्यवस्थापक मोनिता चौधरी,
लेखापाल आशिष बारापात्रे, उपजिविका समन्वयक कुंदा डोंगरे, क्षमता बांधणी समन्वयक
चित्ररेखा जतपेले, सहयोगीनी सुनिता कटरे, हेमलता पडोळे, कुंजलता भुरकुडे, तेजश्वरी
येरकुडे, पुनम साखरे, सुर्यकांता मेश्राम, रोहिणी साखरे, शालु मेश्राम, दुर्गा
रंगारी, गीता भोयर, जिल्हा माहिती कार्यालयाचे पंढरी लुटे व ज्ञानेश्वर वावडेकर
यांनी परिश्रम घेतले. मेळाव्याला गोंदिया तालुक्यातील माविम अंतर्गत कार्यरत
असलेल्या बचतगटातील महिला मोठ्या संख्येने उपस्थित होत्या. प्रास्ताविक जिल्हा
माहिती अधिकारी विवेक खडसे व माविमचे जिल्हा समन्वय अधिकारी श्री.सोसे यांनी केले.
संचालन योगिता राऊत यांनी केले, उपस्थितांचे आभार मोनिता चौधरी यांनी मानले.
Excellent News cover on pradhanmantri mudra yojna..
ReplyDelete