वनहक्क पट्टयांची प्रकरणे त्वरित निकाली काढा - राजकुमार बडोले

    जिल्ह्यातील वैयक्तीक व सामुहिक वनहक्क जमिनीच्या पट्टयाचे वाटप तातडीने करण्यासाठी महसूल विभागाने वन विभागाच्या सहकार्याने केंद्र शासनाकडे पाठपुरावा करुन ही प्रकरणे त्वरित निकाली काढावी. असे निर्देश पालकमंत्री राजकुमार बडोले यांनी दिले.

    20 एप्रिल रोजी जिल्हाधिकारी कार्यालयातील सभागृहात जिल्ह्यातील वनहक्क जमिनीच्या पट्टे वाटपाच्या प्रकरणांचा आढावा घेतांना श्री.बडोले बोलत होते. यावेळी आमदार विजय रहांगडाले, जिल्हाधिकारी अभिमन्यू काळे, जि.प.मुख्य कार्यकारी अधिकारी डॉ.चंद्रकांत पुलकुंडवार, उपवनसंरक्षक एस.युवराज, जि.प.उपाध्यक्ष रचना गहाणे, देवरी उपविभागीय अधिकारी एम.एच.टोणगावकर, तिरोडा उपविभागीय अधिकारी सिध्दार्थ भंडारे, तहसिलदार अरविंद हिंगे,अपर तहसिलदार के.डी.मेश्राम, उपजिल्हाधिकारी(भूसंपादन) विलास ठाकरे, निवासी उपजिल्हाधिकारी प्रविण महिरे यांची प्रामुख्याने उपस्थिती होती.

    श्री.बडोले पुढे म्हणाले, तिरोडा शहरातील झुडपी जंगल प्रकरणाचा केंद्र शासनाकडे योग्य पाठपुरावा करुन ज्याप्रमाणे निपटारा करण्यात आला त्याचप्रमाणे गोंदिया शहरातील संजयनगर येथील झुडपी जंगल प्रकरणाचा सुध्दा निपटारा करण्यात यावा असे यावेळी सांगितले.    

       श्री.रहांगडाले म्हणाले, जिल्ह्यातील वनहक्क पट्टे जमीन धारकांना पीक कर्ज व पीक विमा मंजूर झाला पाहिजे अशी अपेक्षा त्यांनी यावेळी व्यक्त केली. सभेला संबंधित यंत्रणेचे अधिकारी उपस्थित होते.

    जिल्ह्यात वैयक्तीक वनहक्काचे ग्रामस्तरीय गावे 1590, उपविभागीय स्तरीय समितीकडे 3512, तर जिल्हास्तरीय समितीकडे 983 दावे प्रलंबीत असल्याची माहिती उपजिल्हाधिकारी विलास ठाकरे यांनी यावेळी दिली. एकूण प्राप्त प्रकरणापैकी निकाली काढलेल्या प्रकरणांची संख्या 15654 इतकी असून वाटप केलेल्या टायटलची संख्या 8431 इतकी असून 4811.231 हेक्टर टायअल्सच्या जमिनीचे वाटप करण्यात आल्याचे त्यांनी यावेळी सांगितले.

       सामुहिक वनहक्क दाव्यांची संख्या 395 इतकी असून मंजूर गटांची संख्या 843 इतकी आहे. यांना 38676.56 हेक्टर जमीन मंजूर करण्यात आली आहे व प्रलंबीत असलेल्या 257 दाव्यात तपासणीचे काम सुरु असल्याचे त्यांनी सांगितले.