‘कोरोना’चा प्रादुर्भाव रोखण्यासाठी यंत्रणांनी सज्ज राहावे - पालकमंत्री अनिल देशमुख

कोरोना प्रतिबंध उपाययोजना आढावा सभा

राज्य शासनाच्या मार्गदर्शक सूचनांप्रमाणे जिल्ह्यात कोरोना विषाणूचा संसर्ग टाळण्यासाठी उपाययोजना करण्यात येत आहे. कोणीही समाजात कोरोनाबाबत अफवा पसरवित असेल तर त्यांच्यावर कडक कारवाई करण्यात यावी. जिल्ह्यात कोरोना विषाणूचा प्रादुर्भाव रोखण्यासाठी सर्व यंत्रणांनी सज्ज राहून चांगले काम करावे, असे निर्देश पालकमंत्री अनिल देशमुख यांनी दिले.

       आज २५ एप्रिल रोजी जिल्हाधिकारी कार्यालयातील जिल्हा नियोजन समितीच्या सभागृहात जिल्ह्यात कोरोना विषाणूचा संसर्ग रोखण्यासाठी करण्यात येत असलेल्या उपाययोजनांचा आढावा घेताना आयोजित सभेत श्री. देशमुख बोलत होते. यावेळी जिल्हा परिषद अध्यक्ष सीमा मडावी, खासदार प्रफुल पटेल, आमदार सर्वश्री विनोद अग्रवाल, मनोहरराव चंद्रिकापुरे व सहसराम कोरटे, जिल्हाधिकारी डॉ.कादंबरी बलकवडे, जिल्हा परिषद मुख्य कार्यकारी अधिकारी डॉ.राजा दयानिधी, पोलीस अधीक्षक मंगेश शिंदे, सहाय्यक जिल्हाधिकारी रोहन घुगे, शासकीय वैद्यकीय महाविद्यालयाचे प्रभारी अधिष्ठाता डॉ.विनायक रुखमोडे, प्रभारी जिल्हा शल्य चिकित्सक डॉ.हिंमत मेश्राम, जिल्हा आरोग्य अधिकारी डॉ.श्याम निमगडे, उपजिल्हाधिकारी सुभाष चौधरी, प्रभारी निवासी उपजिल्हाधिकारी स्मिता बेलपत्रे, जिल्हा पुरवठा अधिकारी देवराव वानखेडे यांची प्रमुख उपस्थिती होती.

         पालकमंत्री देशमुख म्हणाले, शहरातील भाजी बाजारातील गर्दी टाळण्यासाठी भाजीबाजार मर्यादित वेळेसाठी सुरू ठेवावेत. भाजीबाजारात नागरिकांनी सामाजिक अंतर राखावे, यासाठी त्यांना प्रोत्साहित करावे. जिल्ह्यात रोजगार हमी योजनेच्या कामाची मोठ्या प्रमाणात मागणी असून मजुरांमध्ये सामाजिक अंतर ठेवून ही कामे सुरू करावीत. एपीएल आणि बीपीएलच्या लाभार्थ्यांना पूर्ण धान्य वाटप करावे. ज्यांच्याकडे रेशनकार्ड नाही, अशा गरजू व्यक्तींना देखील धान्य वाटप करावे. धान्य वाटप करतांना आधार लिंकचा प्रश्न उद्भवणार नाही, याकडे प्रशासनाने लक्ष द्यावे असे त्यांनी सांगितले.

         आजपासून पवित्र रमजान महिना सुरू झाला असल्याचे सांगून श्री. देशमुख म्हणाले, जिल्ह्यातील मौलवींची प्रशासनाने बैठक घेऊन मुस्लिम समाजबांधवांना आपल्या घरातच राहून, सामाजिक अंतर ठेवून धार्मिक कार्यक्रम छोट्या स्वरूपात करावे. त्यामुळे विषाणूचा संसर्ग टाळता येईल, असे आवाहन मौलवींच्या माध्यमातून समाजबांधवांना करावे. गोंदिया येथील शासकीय वैद्यकीय महाविद्यालय येथे कोरोना चाचणी प्रयोगशाळा त्वरित सुरू करावी. त्यामुळे स्त्रावाचे नमुने तपासणीसाठी नागपूरला पाठवावे लागणार नाही. वेळेची बचत होऊन रुग्णांवर त्वरित उपचार करता येतील. ‘सारी’  रोगाच्या प्रादुर्भावाची देखील आरोग्य यंत्रणेने दक्षता घेऊन आरोग्य यंत्रणा सज्ज ठेवावी. लॉकडाऊनच्या काळात दिव्यांग बांधवांना आवश्यक ती मदत करून त्यांच्या समस्यांची सोडवणूक करावी, असेही ते यावेळी म्हणाले.

       खासदार पटेल म्हणाले, जिल्हा प्रशासनाकडून कोरोनाचा संसर्ग रोखण्यासाठी चांगल्या प्रकारे उपाययोजना करण्यात येत आहेत. कंटेंनमेंट झोनमध्ये येत असलेल्या गोंदियाच्या गणेश नगर येथील नागरिकांची गैरसोय दूर करण्यासाठी प्रशासनाने तातडीने लक्ष द्यावे. गोरेगाव नगरपरिषदेतील साफसफाईची कामे त्वरित करावी. गोंदिया येथील शासकीय महाविद्यालयातील प्राध्यापकांना मागील चार महिन्यांपासून वेतन मिळाले नसल्यामुळे प्रशासनाने त्याकडे लक्ष द्यावे. गोंदियासाठी जास्तीत जास्त पीपीई कीटची मागणी आरोग्य यंत्रणेने वरिष्ठांकडे करावी, असेही त्यांनी यावेळी सुचविले.                                                       

         जिल्ह्यात रोहयोच्या कामांची जिल्ह्यातील मजुरांकडून मोठ्या प्रमाणात मागणी होत असून ही कामे सामाजिक अंतर ठेवून सुरू करावीत, अशी मागणी आमदार सर्वश्री विनोद अग्रवाल, मनोहरराव चंद्रिकापुरे व सहसराम कोरोटे यांनी एकत्रितपणे केली. आमदार विनोद अग्रवाल यांनी गोंदियातील गणेश नगरच्या नागरिकांची गैरसोय दूर करण्यासाठी त्वरित प्रशासनाने निर्णय घ्यावा. जिल्ह्यात तेंदूपत्ता संकलनास परवानगी देण्यात यावी. त्यामुळे जास्तीत जास्त लोकांना यामधून रोजगार उपलब्ध होणार असल्याचे त्यांनी सांगीतले. जिल्ह्यातील रेती घाटाचे लिलाव त्वरित करावेत, अशी मागणीही यावेळी आमदार मनोहरराव चंद्रिकापुरे यांनी केली. आमदार कोरोटे यांनी रोहयोमधून भातखाचरांची कामे करण्यात यावी, अशी सूचना केली.

         जिल्हाधिकारी डॉ.बलकवडे म्हणाल्या, कन्टेनमेंट झोनमध्ये येत असलेल्या गोंदियातील गणेश नगरच्या नागरिकांची गैरसोय लवकरच दूर करण्यात येईल. अत्यावश्यक सेवेमध्ये असलेल्या गणेश नगरच्या नागरिकांना     ये-जा करण्यास सूट देण्यात येईल. जिल्ह्यात १० कोविड केअर सेंटर आणि ०२ कोविड हॉस्पिटल आहेत. जिल्हा रुग्णालयात ५ व्हेंटिलेटर असून १२ व्हेंटिलेटरची अतिरिक्त मागणी करण्यात आली आहे. शासकीय वैद्यकीय महाविद्यालयात कोरोना चाचणी प्रयोगशाळा सुरू करण्यासाठी परवानगी देण्यात आली आहे. लॉकडाऊनच्या काळात जिल्ह्यातील सतरा शासकीय निवारागृहात ७७८ स्थलांतरित कामगार आश्रयाला आहेत. इतर राज्यातील २२० कामगारांचा यामध्ये समावेश आहे. जिल्ह्यातील धान उत्पादक शेतकऱ्यांना २6९ कोटी रुपये बोनस मिळणार असून त्यापैकी ११३ कोटी रुपये प्राप्त झाले आहे. २४ एप्रिलपर्यंत जिल्ह्यातील शेतकऱ्यांना ७४ कोटी रुपये बोनस म्हणून वाटप केल्याची माहिती त्यांनी यावेळी दिली.

         डॉ.राजा दयानिधी म्हणाले, जिल्ह्यात ग्रामपंचायत अंतर्गत रोहयोची विविध प्रकारची कामे सुरु असून या कामांवर एक हजार मजूर सामाजिक अंतर ठेवून काम करीत आहे. मजुरांच्या आरोग्याची देखील काळजी घेतली जात असल्याचे त्यांनी सांगितले.

         पोलीस अधीक्षक शिंदे म्हणाले, लॉकडाऊनच्या काळात जिल्ह्यात चोख पोलिस बंदोबस्त असून ५४ अधिकारी आणि १८०० पोलीस विविध ठिकाणी तैनात आहे. मध्यप्रदेश आणि छत्तीसगढ राज्यांच्या आणि अन्य जिल्ह्याच्या सीमा बंद करण्यात आल्या आहेत. २०६ गुन्हे दाखल करण्यात आले असून ५८०० वाहनांवर कारवाई करण्यात आली आहे. अत्यावश्यक सेवेसाठी नागरिकांना हेल्पलाइन व टोल फ्री क्रमांक उपलब्ध करून देण्यात आले आहे. बंदोबस्तासाठी तैनात असलेल्या पोलीस अधिकारी आणि कर्मचाऱ्यांच्या आरोग्याची काळजी घेण्यात येत आहे. त्यांची आरोग्य तपासणी देखील करण्यात आल्याचे त्यांनी यावेळी सांगितले.

00000

कोरोना मुकाबल्यासाठी सर्व ग्रामपंचायत सज्ज

     कोरोना व्हायरसच्या प्रसारामुळे जग भयभीत झाले आहे. कोरोना हे आजच्या घडीला जगावर आलेले मोठे संकट आहे. कोरोना विषाणूचा संसर्ग रोखण्यासाठी शासन-प्रशासन एकजुटीने प्रयत्न करीत आहे. जिल्ह्यातील एकाही व्यक्तीला या विषाणूची बाधा होऊ नये म्हणून जिल्हा प्रशासन हे आरोग्य यंत्रणा, पोलीस विभागासह अन्य यंत्रणांना सोबत घेऊन दिवस-रात्र काम करीत आहे.

        जिल्ह्यातील ग्रामीण भागातील नागरिकांच्या आरोग्याची जिल्हा परिषद काळजी घेत असून कोरोना विषाणूचा ग्रामीण भागात मुकाबला करण्यासाठी जिल्ह्यातील सर्वच 545 ग्रामपंचायती सज्ज आहेत. जिल्ह्यातील सर्वच ग्रामपंचायतीमध्ये हॅन्डवॉश स्टेशन सुरू करण्यात आले आहे. नागरिकांनी हात कशाप्रकारे धुतले पाहिजे याची तांत्रिक माहिती देणारे बॅनर या सर्व ग्रामपंचायतीमध्ये लावण्यात आले आहे. सचित्र बॅनरवरून हात कशाप्रकारे धुवावे याची माहिती ग्रामस्थांना मिळत आहे. कोरोना विषाणुची बाधा होऊ नये यासाठी कोणती दक्षता घेतली पाहिजे याबाबत जागृती करणारे बॅनर्स जिल्ह्यातील सर्व ग्रामपंचायतीमध्ये लावण्यात आले आहे. या बॅनरवरील माहिती वाचून नागरिक दक्ष होत आहे, सोबत इतरांना सुद्धा कोरोनाचा प्रतिबंध करण्यासाठी कोणकोणत्या उपाययोजना केल्या पाहिजे याबाबत माहिती देत आहेत.

        जिल्ह्यातील सर्व ग्रामपंचायतींमध्ये जंतूनाशकाची फवारणी करण्यात आल्यामुळे कोरोनासह अन्य आजारांना प्रतिबंध घालण्यात मदत झाली आहे. बहुतांश ग्रामपंचायतीच्या नाल्यांची साफसफाई करण्यात आली आहे. त्यामुळे रोगराईस प्रतिबंध करण्यास हातभार लागला आहे. ग्रामस्थांचे प्रबोधन करण्यास जिल्हा परिषद सदस्य, पंचायत समिती सदस्य, गटविकास अधिकारी, सरपंच आणि ग्रामसेवक यांनी पुढाकार घेतल्यामुळे  ग्रामीण भागामध्ये मोठ्या प्रमाणात जनजागृती होत आहे. 

       कोरोना विषाणूला प्रतिबंध करण्यासाठी उपाययोजनेचा एक भाग म्हणून करण्यात आलेल्या लॉकडाऊनच्या काळात बाहेर राज्यात, जिल्ह्यात रोजगारासाठी  गेलेले गावातील व्यक्ती परत गावात आल्यास त्या व्यक्तीची तसेच विदेश प्रवास करून आलेल्या व्यक्तीच्या संपर्कात आलेल्या व्यक्तीची माहिती  गावातील नागरिकांनी सरपंच, तहसीलदार यांना देऊन त्यांची आरोग्य तपासणी करून घेतली आहे. आरोग्य विभागाच्या सल्ल्याने आवश्यकता असल्यास त्यांचे घरीच अलगीकरण देखील करण्यात आले. त्यांच्यावर ग्रामस्थांचे लक्ष होते. यावरून कोरोना विषाणूबाबत ग्रामस्थ किती जागृत आहेत हे यापूर्वीच दिसून आले आहे. गावातील काही गरीब व गरजू व्यक्ती आहेत ज्यांना योजनांचा लाभ मिळू शकत नाही अशांच्या मदतीसाठी  ग्रामपंचायत आणि गावातील प्रतिष्ठित नागरिकांनी पुढाकार घेऊन त्यांना जीवनावश्यक वस्तूंची मदत देखील केली आहे. काही ग्रामपंचायतींनी ग्रामस्थांना मास्कचे वाटप केले आहे. कोरोनाविरुद्धची ही लढाई जिंकण्यास जिल्ह्यातील ग्रामपंचायती तयारीनिशी सज्ज झाल्या आहेत. ग्रामस्थांची सजगता, ग्रामपंचायतींनी केलेल्या प्रतिबंधात्मक उपाययोजना, शासन आणि प्रशासनाचे लाभलेले पाठबळ यातून कोरोनाविरुद्धची लढाई ग्रामपंचायती निश्चितच जिंकतील.

00000

माविमच्या महिला करताहेत जनजागृती,मास्क निर्मिती आणि बिझनेस करस्पाँडंट म्हणूनही काम

संपूर्ण जग आज कोरोना विषाणूच्या संकटाचा सामना करीत आहे. जगातील अनेक विकसित आणि प्रगत देशातील नागरिक या विषाणूच्या संसर्गाने बाधित होऊन मृत्युमुखी पडत आहे. बाधित होण्याचे आणि मृत्युचे प्रमाण दिवसेंदिवस वाढतच आहे .आपल्या देशात आणि राज्यात देखील या विषाणूची बाधा पोहोचली आहे.आजवर या विषाणूवर लस उपलब्ध झालेली नाही. या विषाणूची संसर्ग साखळी तोडणे  हाच यावरचा सध्याचा उपाय आहे. गोंदियासारख्या दुर्गम, मागास,आदिवासीबहुल, नक्षलदृष्टया संवेदनशील आणि राज्याच्या टोकावर असलेल्या जिल्ह्यात कोणताही नागरिक हा या विषाणूने बाधित होऊ नये म्हणून जिल्हा प्रशासन आरोग्य विभागासह विविध यंत्रणांना सोबत घेऊन काम करीत आहे.

जिल्ह्यात महिला आर्थिक विकास महामंडळ अंतर्गत स्थापित ग्रामीण आणि शहरी भागातील बचतगटांच्या महिला कोरोना विरुद्धच्या लढ्यात प्रशासनाला साथ देण्यासाठी उतरल्या आहेत. माविमच्या ह्या महिला गावोगावी पोस्टर्सच्या माध्यमातून कोरोनाचा संसर्ग टाळण्यासाठी जनजागृतीचा संदेश देत आहे. या विषाणूचा प्रादुर्भाव रोखण्यासाठी उपयोगात येणार्‍या कापडी मास्कची निर्मिती करीत आहे.तर बँकेत अनुदानाची रक्कम काढण्यासाठी येणाऱ्या ग्रामीण लाभार्थ्यांची बँकेत होणारी गर्दी टाळण्यासाठी त्या लाभार्थ्यांना घरपोच अनुदानाची रक्कम बँक करस्पाँडंट या नात्याने ह्या महिला काम करीत आहे.

माविमच्या बचतगटातील महिला ह्या जिल्ह्यात कोरोना विषाणूचा संसर्ग रोखण्यासाठी गावोगावी पोस्टर्सवर संदेश लिहून जनजागृती करीत आहे. पोस्टर्सवर  लिहिलेल्या घरीच राहा ,सुरक्षित राहा, खोकतांना किंवा शिंकतांना रुमाल किंवा मास्कचा वापर करा, शासनाच्या आदेशाचे पालन करा,वेळोवेळी हात स्वच्छ धुवा अनावश्यक घराबाहेर पडू नका, गर्दी करू नका असे संदेश या महिला सामाजिक अंतर ठेवून आणि नाक व तोंडाला रुमाल किंवा मास्क लावून गावात घरोघरी देत असल्यामुळे ग्रामीण आणि शहरी भागात कोरोना विषाणूबाबत नागरिकांमध्ये जागृती होत असून लोक दक्षता घेऊ लागले आहे.कोरोना विषाणूचे  गांभीर्य लोकांना त्यांच्या संदेशातून होऊ लागल्याने त्याबाबतचे प्रत्यक्ष आचरण देखील लोक करू लागले आहेत. बचतगटातील महिला कोरोनविषयी जनजागृती करू लागल्याने प्रशासन आणि आरोग्य विभागाला या महिलांची मदत होऊ लागली आहे.

            कोरोनाबाबत जनजागृती करण्यास बचत गटातील महिलांनी पुढाकार तर घेतला आहेच.यापुढेही जाऊन त्यांनी कोरोना विषाणूचा संसर्ग टाळण्यासाठी नाक आणि तोंड झाकण्यासाठी वापरण्यात येणारे कापडी मास्क तयार करून विक्री देखील केली आहे. माविमच्या गोंदिया येथील उत्कर्ष लोकसंचालित साधन केंद्राच्या कापडी पिशवी उद्योग निर्मिती केंद्रामध्ये ग्रामीण व शहरी भागातील बचतगटांच्या महिला आधुनिक शिलाई मशीनवर कापडी मास्क तयार करीत आहे. आतापर्यंत या महिलांनी 21600 मास्क तयार करून त्याची विक्री देखील केली आहे. मास्क निर्मितीतून या महिलांना रोजगाराचे एक साधन उपलब्ध झाले आहे.जिल्ह्यात कोरोनाविरुद्धच्या लढ्यात मास्क निर्मिती करून महिलांनी आपले योगदान दिले आहे .

गर्दी टाळणे आणि सामाजिक अंतर ठेवणे हा सुद्धा कोरोना विषाणूचा प्रतिबंध करण्यासाठीच्या उपाययोजनेचा एक भाग आहे.अनेक योजनांचे अनुदान लाभार्थ्यांच्या थेट खात्यामध्ये जमा होत आहे. ज्या लाभार्थ्यांचे बँक खाते आधार लिंक आहे अशा लाभार्थ्यांना माविमच्या 52 बँक करस्पाँडंट महिला ह्या त्यांच्याजवळ असलेल्या मायक्रो एटीएमच्या माध्यमातून घरबसल्या प्रधानमंत्री जनधन योजना, शेतकरी सन्मान योजना, उज्वला गॅस योजना, संजय गांधी निराधार योजना, महात्मा गांधी राष्ट्रीय ग्रामीण रोजगार हमी योजना यासह अनेक अन्य योजनांचे अनुदान किंवा मजुरीची रोख रक्कम घरबसल्या लाभार्थ्यांना देत असल्यामुळे ग्रामीण भागातील अनेक लाभार्थ्याची बँकेतुन पैसे काढण्यासाठी होणारी पायपीट तर थांबली आहेच सोबतच कोरोना विषाणूच्या संसर्गापासून विविध योजनेच्या लाभार्थ्याचा बचाव करण्यास माविमच्या बँक करस्पाँडंट मदत होत आहे.

 जिल्ह्यातील ग्रामीण आणि शहरी भागातील माविमच्या 6028 बचतगटातील हजारो महिला या विषाणूचा जिल्ह्यात संसर्ग रोखण्यासाठी पुढाकार घेत आहे.पोस्टर्सवरील संदेशाच्या माध्यमातून नागरिकांमध्ये जनजागृती होत आहे.कापड मास्क तयार करून कोरोनाचा संसर्ग रोखण्यास महिलांचा प्रत्यक्ष हातभार लागत आहे.लॉकडाऊनच्या काळात ग्रामीण भागातील गरीब लाभार्थ्यांची  अनुदानासाठी बँकेत येण्याची पायपीट थांबवून कोरोनाच्या संसर्गाला आळा घालण्यासाठी लाभार्थ्यांना घरीच बायोमेट्रिक पध्दतीचा वापर करुन मायक्रो एटीएममधून अनुदानाची रोख रक्कम उपलब्ध होत असल्यामुळे त्यांच्या चेहऱ्यावर आनंद दिसून येत आहे.जिल्ह्यात कोरोना विषाणूचा संसर्ग रोखण्याच्या लढाईत माविमच्या बचतगटातील महिला देखील आपले योगदान देत आहे.

                                                                                                       विवेक खडसे,गोंदिया

कोरोनाचा संसर्ग टाळण्यासाठी विशेष दक्षता घेऊन प्रतिबंधात्मक उपाययोजनांची काटेकोरपणे अंमलबजावणी करा - पालकमंत्री अनिल देशमुख

व्हिडिओ कॉन्फरन्सद्वारे घेतला जिल्ह्याचा आढावा

\

    कोरोना विषाणू संसर्ग जिल्ह्यातील कोणत्याही नागरिकाला होऊ नये यासाठी जिल्हा प्रशासनाने विशेष दक्षता घेऊन प्रतिबंधात्मक उपाययोजनांची काटेकोरपणे अंमलबजावणी करावी, असे निर्देश पालकमंत्री अनिल देशमुख यांनी दिले.

         आज 16 एप्रिल रोजी व्हिडिओ कॉन्फरन्सच्या माध्यमातून  जिल्ह्यात कोरोना प्रतिबंधासाठी करण्यात येत असलेल्या उपाययोजनांची  माहिती जाणून घेतली. गोंदिया येथून जिल्हाधिकारी डॉ.कादंबरी बलकवडे, जिल्हा परिषदेचे मुख्य कार्यकारी अधिकारी डॉ.राजा दयानिधी, पोलीस अधीक्षक मंगेश शिंदे, शासकीय वैद्यकीय महाविद्यालयाचे प्रभारी अधिष्ठाता डॉ.विनायक रुखमोडे, जिल्हा शल्यचिकित्सक डॉ.संजीव दोडके, जिल्हा आरोग्य अधिकारी डॉ.श्याम निमगडे, जिल्हा पुरवठा अधिकारी देवराव वानखेडे,यांच्यासह इतर सर्व नोडल अधिकारी प्रामुख्याने या बैठकीला उपस्थित होते.

         पालकमंत्री देशमुख यांनी जिल्हा प्रशासनाच्या सतर्कतेने आणि वैद्यकीय यंत्रणेने वेळीच उपचार केल्याने गोंदिया शहरातील एक कोरोना पॉझिटिव्ह रुग्ण हा निगेटिव्ह होऊन घरी परतल्याबद्दल जिल्हा प्रशासनाचे व यंत्रणांचे अभिनंदन केले. जिल्हा कोरोना मुक्त करण्यासाठी प्रशासकीय स्तरावर आपली कोणतीही आवश्यकता असल्यास आपण चोवीस तास उपलब्ध असल्याचे त्यांनी सांगितले. विनाकारण बाहेर फिरणाऱ्यांवर कडक कारवाई करावी. जिल्ह्यात लॉकडाऊनचे सर्वांनी तंतोतंत पालन करावे. कोरोना विषाणूचा प्रादुर्भाव रोखण्यासाठी जिल्ह्यातील सर्व नागरिकांनी घरातच राहावे. सार्वजनिक ठिकाणी महत्वाच्या कामानिमित्त जातांना नाक आणि तोंड झाकण्यासाठी मास्क, स्वच्छ कापडाचे रुमाल किंवा दुपट्ट्यांचा वापर करावा. सर्वांनी सुरक्षित सामाजिक अंतर ठेवावे असे आवाहन देखील त्यांनी जिल्ह्यातील जनतेला यावेळी केले. 

         पोलीस विभागाने नाकाबंदीसाठी कर्तव्य बजावणाऱ्या पोलीस अधिकारी/ कर्मचाऱ्यांसाठी उभारलेल्या ग्रीन शेडची पालकमंत्र्यांनी यावेळी प्रशंसा केली. जिल्ह्यात फिल्डवर कर्तव्यावर असणाऱ्या सर्व पोलिस अधिकारी कर्मचाऱ्यांसाठी ग्रीन शेड उपलब्ध करून देण्याचे निर्देश त्यांनी यावेळी पोलीस अधीक्षकांना दिले.

         जिल्हाधिकारी डॉ.बलकवडे यांनी यावेळी सांगितले की, जिल्ह्यात कोरोना विषाणूचा संसर्ग रोखण्यासाठी प्रतिबंधात्मक उपाययोजना म्हणून जिल्ह्यात अत्यावश्यक सेवा सुरू केल्या आहेत. गर्दी टाळण्यासाठी जीवनावश्यक वस्तू घरपोच सेवा पुरविण्यात येत आहे. नागरिकांच्या विविध समस्यांचे निराकरण करण्यासाठी  जिल्हा प्रशासन आणि पोलिस प्रशासनाच्या वतीने 24 तास नियंत्रण कक्ष, व्हाट्सअप हेल्पलाइन नंबर सुरू करण्यात आला आहे. जिल्ह्यातील नागरिकांना कोरोना विषयक विविध शंकांचे निराकरण करण्यासाठी जिल्हा परिषद गोंदिया येथे 24 तास डॉक्टरांची सेवा हेल्पलाइनच्या माध्यमातून उपलब्ध करून देण्यात आली आहे. जिल्ह्यात 17 निवारागृहात लॉकडाऊनमध्ये अडकलेल्या 737 नागरिकांची निवास व भोजनाची व्यवस्था करण्यात आल्याचे त्यांनी सांगितले.

         पोलीस अधीक्षक शिंदे म्हणाले, जिल्ह्यात संचारबंदीच्या काळात कलम 144 चे काटेकोरपणे पालन करण्यात येत आहे. गोंदिया शहरातील गणेशनगर हा भाग कंटेन्मेंट झोनमध्ये येत असल्यामुळे पोलिसांचा या भागात पुढील 28 दिवस चोख पोलिस बंदोबस्त राहणार आहे. 553 नागरिकांना इमर्जन्सी पासेस देण्यात आल्या आहेत. लॉकडाऊन झाल्यापासून आजपर्यंत वेगवेगळ्या प्रकरणात 186 गुन्हे दाखल करण्यात आले आहे. 3 हजार 877 वाहनचालकांवर कारवाई करून 7 लाख 99 हजार 700 रुपयांचा दंड वसूल करण्यात आल्याची माहिती पालकमंत्र्यांना यावेळी दिली.

          जिल्हाधिकारी डॉ.बलकवडे यांनी जिल्ह्याकरिता कोविड नमुन्यांची चाचणी प्रयोगशाळा उभारणीसाठी व्हेंटिलेटर खरेदीसाठी तसेच पोलीस प्रशासनाला मदतीसाठी 200 गृहरक्षक उपलब्ध करून देण्यासाठी आवश्यक निधीची मागणी यावेळी केली. तसेच जिल्ह्यात ग्रामीण व शहरी भागात काम करणाऱ्या आशा वर्कर, अंगणवाडी सेविका, तलाठी, पोलिस व महसूल कर्मचारी जे फिल्डवर काम करतात अशा अधिकारी कर्मचाऱ्यांचा समावेश प्रधानमंत्री गरीब कल्याण योजनेअंतर्गत करावा अशी मागणी जिल्हाधिकारी यांनी यावेळी पालकमंत्र्यांना केली. 

         कोरोना विषाणूचा संसर्ग रोखण्यासाठी प्रतिबंधात्मक उपाययोजना म्हणून केंद्र सरकारच्या मार्गदर्शक सूचनेनुसार माइल्ड, मॉडरेट व सिवियर या प्रकारच्या कोरोना संशयित  रूग्णांसाठी किंवा लक्षणे असलेल्या नागरिकांसाठी कोविड केअर सेंटर- 677 खाटा,  डेडिकेटेड कोविड हेल्थ सेंटर- 190 खाटा, डेडिकेटेड कोविड हॉस्पिटल- 200 खाटाचे उभारण्यात येत असल्याची माहिती जिल्हा शल्य चिकित्सक व शासकीय वैद्यकीय महाविद्यालयाचे अधिष्ठाता यांनी यावेळी दिली. 

         जिल्ह्यात आज 9 व्हेंटिलेटर उपलब्ध असून 12 व्हेंटिलेटर खरेदीची प्रक्रिया सुरू आहे. तसेच ट्रिपल लेअर मास्क 64 हजार 850 व एन-95 मास्क 1749 तसेच पीपीई किट 196 उपलब्ध असून जिल्हा सामान्य रुग्णालयाच्या 4 खाटांचे कक्ष उभारण्यात आल्याची माहिती जिल्हा शल्यचिकित्सक डॉ.दोडके यांनी यावेळी दिली.

                                                   00000

गोंदिया जिल्ह्यात एकही व्यक्ती उपाशी राहणार नाही बारा हजार शिधापत्रिका नसलेल्या कुटुंबियांना जीवनावश्यक वस्तूंचे वाटप करणार - पालकमंत्री अनिल देशमुख

         गोंदिया जिल्ह्यातील ज्यांच्याकडे शिधापत्रिका नाही अशा बारा हजार कुटुंबांना जिल्हा प्रशासनातर्फे  कुटुंबास एक असे जीवनावश्यक वस्तूंचे संच देण्यात येणार आहे. कोणत्याही परिस्थितीत जिल्ह्यातील एकही व्यक्ती  उपाशी राहणार नाही. अशी ग्वाही पालकमंत्री गोंदिया तथा गृहमंत्री अनिल देशमुख यांनी जिल्हावासीयांना दिली आहे.

         गोंदिया जिल्ह्यात सार्वजनिक वितरण व्यवस्थेअंतर्गत एकूण 299288 कार्डधारक असून त्यावरील लोकसंख्या 1407078 आहे. यापैकी अंत्योदय कार्डधारक 79156 तर प्राधान्य कुटुंब योजना कार्ड धारक 139613 असे एकूण 218769 कार्डधारक आहेत. यावर नोंदविलेल्या 1025393 लोकसंख्येला एप्रिल, मे व जून या तीन महिन्याचे नियमित अन्नधान्य तसेच प्रधानमंत्री गरीब कल्याण योजनेचे प्रति मानसी पाच किलो तांदूळ यांचे मोफत वाटप होत आहे. तसेच मे व जून करिता अन्न सुरक्षा योजनेत समावेश नसलेल्या  85133 केशरी कार्ड धारकांची संख्या व त्यावरील 351269 लोकसंख्या यांना मे व जून या दोन महिन्याकरिता गहू प्रति किलो 8 रुपये व तांदूळ प्रति किलो 12 रुपये प्रमाणे प्रतिव्यक्ती तीन किलो गहू व दोन किलो तांदूळ राज्य शासन उपलब्ध करून देत आहे.

       कोणत्याही परिस्थितीमध्ये जिल्ह्यातील एकही व्यक्ती उपाशी राहणार नाही याची दक्षता घ्यावी, असे स्पष्ट निर्देश पालकमंत्र्यांनी जिल्हा प्रशासनाला दिले आहेत.

00000

गोंदियातील तो युवक झाला कोरोनामुक्त

       जगभर थैमान घातलेल्या कोरोना विषाणूने मागील महिन्यातच देशात प्रवेश केला. त्यातच गोंदिया येथील गणेशनगरचा एक युवक 17 मार्चला थायलंड या देशातून पर्यटन करून गोंदियात पोहोचला. जिल्हा प्रशासनाने तातडीने पावले उचलून तो कोरोना बाधित असल्याच्या शंकेने त्याला 25 मार्चला गोंदिया येथील शासकीय वैद्यकीय महाविद्यालयातील विलगीकरण कक्षात दाखल केले होते. आज 10 एप्रिल रोजी त्याचा अहवाल निगेटिव्ह आल्यामुळे त्याला कोरोनामुक्त झाल्याचे वैद्यकीयदृष्ट्या सिद्ध झाले. यावरून त्याला आज घरी जाण्यासाठी सुट्टी देण्यात आली. 

         25 मार्चला या युवकाला गोंदिया येथील शासकीय वैद्यकीय महाविद्यालयात दाखल केल्यानंतर त्याचे नमुने तपासणीसाठी नागपूर येथील प्रयोगशाळेत पाठविण्यात आले. 26 मार्चला त्याचा अहवाल पॉझिटिव्ह आल्यामुळे तो कोरोना बाधित असल्याचे सिद्ध  झाले. कोरोनाविषयक शासनाच्या मार्गदर्शक सूचनांप्रमाणे वैद्यकीय चमू त्याच्यावर उपचार करीत होती. त्यानंतर 8 एप्रिलला दुसऱ्यांदा त्याचे नमुने घेऊन तपासणीसाठी नागपूर येथे पाठविण्यात आले. त्या नमुन्याचा अहवाल निगेटिव्ह आला. त्यानंतर पुन्हा  तिसऱ्यावेळी 9 एप्रिलला त्याचे नमुने प्रयोगशाळेत पाठविण्यात आले. आज 10 एप्रिल रोजी त्याचा अहवाल निगेटिव्ह आल्यामुळे आरोग्य विभागाने त्याचे समुपदेशन करून सुट्टी दिली. अखेर त्या युवकाने कोरोनामुक्त होऊन कोरोनाविरुद्धची लढाई जिंकली.

*समुपदेशन आणि प्रतिबंध*

       गणेशनगर येथील त्या युवकाने कोरोनाविरुद्धची लढाई जिंकल्यानंतर शासकीय वैद्यकीय महाविद्यालयातून सुट्टी देण्यापूर्वी त्याचे व त्याच्या परिवारातील सदस्यांचे वैद्यकीय चमूने समुपदेशन केले. आजपासून त्या युवकाला आणखी चौदा दिवस घरीच अलगीकरणात राहावे लागणार आहे. आरोग्यविषयक काळजी त्याने व त्याच्या कुटुंबातील सदस्यांना घ्यावी लागणार आहे. आरोग्यविषयक काही तक्रारी असल्यास  तातडीने वैद्यकीय अधिकाऱ्यांना त्याबाबत अवगत करावे लागणार आहे. दररोज आपल्या प्रकृतीची माहिती त्याने स्वतः वैद्यकीय अधिकाऱ्यांना द्यावी लागणार आहे. दिवसातून अनेकदा हात पाण्याने स्वच्छ धुवावे लागणार आहे. त्या युवकाच्या कुटुंबाला  तो राहत असलेले घर व परिसर स्वच्छ ठेवावा लागणार आहे. घरातील व्यक्तींनी सुद्धा वारंवार पाण्याने हात स्वच्छ धुवावे अशा सूचना समुपदेशनातून त्यांना करण्यात आल्या आहे. डॉक्टरांची एक चमू त्याच्या घरी भेट देऊन त्याची नियमित तपासणी करणार आहे. त्या युवकाने नियमित पौष्टिक आहाराचे सेवन करावे असा सल्ला त्याला  समुपदेशनातून देण्यात आला आहे.

         तो युवक कोरोना बाधित असल्याचा अहवाल आल्यानंतर तो राहत असलेल्या गणेशनगरचा परिसर यापूर्वीच येण्याजाण्यास पोलिसांनी प्रतिबंधित केला होता. आज 10 एप्रिल रोजी तो युवक  कोरोना विषाणूच्या संसर्गातून मुक्त जरी झाला असला तरी आजपासून म्हणजे 10 एप्रिलपासून पुढील 28 दिवस गणेशनगरचा परिसर नागरिकांना येण्या-जाण्यासाठी प्रतिबंधितच राहणार आहे. पोलीस बंदोबस्त 28 दिवस तेथे कायम राहणार आहे. या भागातील नागरिकांनी आपल्या आरोग्याची काळजी घ्यावी. असे आवाहन जिल्हा प्रशासनाच्या वतीने करण्यात आले आहे.

00000

गोंदिया जिल्ह्यात 5100 मेट्रिक टन धान्याचे वाटप

                                    लॉकडाऊनच्या काळातील उपाययोजना

                                        1 एप्रिलपासून मोफत तांदूळ उपलब्ध

   कोरोनाच्या पार्श्वभूमीवर सुरु असलेल्या लॉकडाऊन काळात जिल्ह्यातील कुठलाही नागरिक उपाशी राहता कामा नये यासाठी अन्न नागरी पुरवठा विभागाकडून विविध उपाययोजना केल्या आहे. जिल्ह्यातील स्वस्त धान्य दुकानांमधून धान्याचे वितरण सुरळीत सुरु असून दि. 1 ते 7 एप्रिल 2020 या सात दिवसात गोंदिया जिल्ह्यातील 1,63,500 शिधापत्रिका धारकांना तब्बल 51000 क्विंटल धान्याचे वाटप करण्याचा उच्चांक गाठला असल्याची माहिती गोंदियाचे जिल्हा पुरवठा अधिकारी देवराव वानखेडे यांनी दिली आहे. तसेच टंचाई भासवून चढ्या दराने विक्री करणाऱ्या दुकानदारांवर जीवनावश्यक वस्तू अधिनियम 1955 कलम 3 व 7 अन्वये कारवाई करण्यात येईल असे त्यांना सूचित करण्यात आले आहे.

         जिल्ह्यात राष्ट्रीय अन्नसुरक्षा योजनेअंतर्गत अंत्योदय व प्राधान्य कुटुंब लाभार्थी असे दोन्ही रेशनकार्डमधील पात्र लाभार्थ्यांची संख्या 2,18,544  कार्ड संख्या व त्यावरील लोकसंख्या 10,21,581 इतकी आहे. या लाभार्थ्यांना 998 स्वस्त धान्य दुकानांद्वारे सार्वजनिक वितरण व्यवस्थेचा लाभ दिला जातो. बीपीएल कार्ड असलेल्या लाभार्थ्यांना अंत्योदय योजनेअंतर्गत 2 रुपये किलो दराने प्रती कार्ड 10 किलो गहू आणि 3 रुपये किलो दराने प्रती कार्ड 25 किलो तांदूळ दिला जातो. त्याचप्रमाणे 20 रुपये किलो दराने एक किलो साखर दिली जाते. तर प्राधान्य कुटुंब लाभार्थ्यांना    2 रुपये किलो दराने प्रती व्यक्ती 2 किलो गहू आणि 3 रुपये किलो दराने प्रती व्यक्ती 3 किलो तांदूळ दिला जातो.

          प्रधानमंत्री गरीब कल्याण अन्न योजनेअंतर्गत एप्रिल ते जूनपर्यंत प्रती लाभार्थी प्रती महीने 5 किलो तांदूळ मोफत देण्याची योजना आहे. पात्र रेशन कार्ड धारकाने नियमित स्वस्त धान्य खरेदी केल्यानंतर त्या कुटुंबातील प्रत्येक व्यक्तीला 5 किलो अतिरिक्त तांदूळ मोफत देण्याची सूचना केंद्र शासनाने व्हिडीओ कॉन्फरन्स द्वारे दिलेली आहे. त्यामुळे आता प्रत्येक पात्र रेशन कार्ड धारकाला नियमित धान्य घेतल्यानंतर प्रती व्यक्ती 5 किलो तांदुळ या एप्रिल महिन्यापासून कुटुंबातील व्यक्तींच्या संख्येनुसार मोफत उपलब्ध करून देण्यात येणार आहे.

*जास्त दराने वस्तूंची विक्री केल्यास होणार कारवाई*

            जिल्ह्यात जीवनावश्यक वस्तूंची आणि औषधांची कोणतीही टंचाई नाही. किराणा दुकानांमधून वस्तूंचा पुरवठा सुरळीत व्हावा याकरिता शासन यंत्रणा खबरदारी घेत आहे. मात्र सध्या लॉकडाऊनच्या पार्श्वभूमीवर काळाबाजार व अतिरिक्त भाव वाढीच्या अनेक  ठिकाणाहून तक्रारी प्राप्त होत आहेत. जीवनावश्यक वस्तूंची साठेबाजी किंवा चढ्या दराने विक्री केल्यास सात वर्षापर्यंत कैद होवू शकते. याबाबत पुरवठा विभाग,वैध मापन शास्त्र विभाग व पोलीस यांना संयुक्त कारवाई करण्याचे आदेश देण्यात आल्याची माहिती जिल्हा पुरवठा अधिकारी देवराव वानखेडे यांनी दिली आहे.