राष्ट्रीय क्रीडा दिन उत्साहात साजरा

 

मेजर ध्यानचंद यांच्या क्रीडा योगदानाचे स्मरण; राष्ट्रीय स्तरावरील खेळाडूंचा सत्कार

गोंदिया, दि.4 : भारतीय क्रीडा प्राधिकरणाच्या निर्देशानुसार आणि जिल्हा क्रीडा परिषदेच्या अधिपत्याखाली जिल्हा क्रीडा अधिकारी कार्यालय, गोंदिया व एकविध क्रीडा संघटनांच्या संयुक्त विद्यमाने 28 ते 30 ऑगस्टदरम्यान विविध क्रीडा उपक्रमांचे आयोजन करण्यात आले. या उपक्रमाचा मुख्य कार्यक्रम 29 ऑगस्ट रोजी जिल्हा क्रीडा अधिकारी कार्यालय, गोंदिया येथे उत्साहात पार पडला. जिल्हा क्रीडा अधिकारी लक्ष्मीशंकर यादव यांच्या मार्गदर्शनाखाली कार्यक्रमाचे आयोजन करण्यात आले.
कार्यक्रमाची सुरुवात दीपप्रज्वलनाने झाली. त्यानंतर हॉकीचे जादूगार व महान क्रीडापटू मेजर ध्यानचंद यांच्या प्रतिमेस पुष्पहार अर्पण करून अभिवादन करण्यात आले. भारतीय हॉकीला जागतिक स्तरावर लौकिक मिळवून देण्यात मेजर ध्यानचंद यांचे मोलाचे योगदान असून, त्यांच्या क्रीडा कारकिर्दीची व ऑलिम्पिकमधील उल्लेखनीय कामगिरीची माहिती उपस्थित खेळाडूंना यावेळी देण्यात आली.
यावेळी तालुका क्रीडा अधिकारी पूजा श्रीवास, क्रीडा अधिकारी राहुल देशमुख, विविध एकविध क्रीडा संघटनांचे प्रशिक्षक व पदाधिकारी तसेच विविध खेळांचे प्रशिक्षक उपस्थित होते. प्रशिक्षकांनी खेळाचे शारीरिक व मानसिक आरोग्यासह व्यक्तिमत्त्व विकासातील महत्त्व विशद केले. तसेच खेळाडूंनी योग्य आहार, पुरेशी झोप आणि नियमित सराव याकडे विशेष लक्ष देण्याचे आवाहन केले.
कार्यक्रमास खेलो इंडिया, मिशन लक्ष्यवेध तसेच नेटबॉलचे खेळाडू मोठ्या संख्येने सहभागी झाले. यावेळी राष्ट्रीय स्तरावरील खेळाडूंचा सत्कार, क्रीडा प्रतिज्ञा, पारंपरिक खेळ, सायकल रॅली आदी विविध उपक्रम घेण्यात आले.
राष्ट्रीय शालेय क्रीडा स्पर्धेत सहभागी होऊन प्राविण्य मिळविणाऱ्या युकांत उके, दक्ष ठाकरे, खुशी हलमारे, रोहित शरणागत आणि एविना चौरागडे या खेळाडूंना शिष्यवृत्तीचे धनादेश मान्यवरांच्या हस्ते वितरित करण्यात आले.
कार्यक्रमाचे सूत्रसंचालन ऋतुराज गायकवाड यांनी केले, तर अंकुश गजभिये यांनी उपस्थितांचे आभार मानले. कार्यक्रमास खेळाडू, प्रशिक्षक, क्रीडाप्रेमी व नागरिक मोठ्या संख्येने उपस्थित होते.
0000000