आत्मविश्वास व सकारात्मक विचारसरणीसाठी खेळ उपयुक्त - डॉ.जितेंद्र रामगावकर

गोंदिया,दि.23 : खिलाडू वृत्तीने चांगले काम केल्यास यश नक्की मिळते. जीवनात आत्मविश्वास वाढीसाठी व सकारात्मक विचारसरणीसाठी खेळ उपयुक्त असल्याचे प्रतिपादन उपवनसंरक्षक डॉ.जितेंद्र रामगावकर यांनी व्यक्त केले.

       जिल्हा पोलीस क्रीडा स्पर्धा-2016 चा समारोप बक्षीस व पारितोषिक वितरण आज (ता.23) कारंजा येथील पोलीस कवायत मैदान येथे डॉ.रामगावकर यांच्या हस्ते करण्यात आले. याप्रसंगी ते बोलत होते. पोलीस अधीक्षक डॉ.दिलीप पाटील-भुजबळ, अपर पोलीस अधीक्षक डॉ.संदीप पखाले, उपविभागीय पोलीस अधिकारी सर्वश्री रमेश बरकते (गोंदिया), मंदार जवळे (देवरी), दिपाली खन्ना (आमगाव), परिविक्षाधीप पोलीस उपअधीक्षक राजीव नवले, आयबीचे श्री.पशीने यांची प्रमुख उपस्थिती होती.

       डॉ.रामगावकर पुढे म्हणाले, मानसिकता व सांघिकवृत्ती या सांघिक भावना वृध्दींगत होण्यास क्रीडा स्पर्धा हया उपयुक्त आहेत. पोलीस अधिकारी-कर्मचारी आपल्या कुटुंबांपासून दूर राहून देशाची व राज्याची सेवा करतात. शारिरीक तंदुरुस्त राहण्यास खेळ अत्यंत उपयुक्त आहे. आजारांना दूर ठेवण्यास खेळांची महत्वाची भूमिका आहे. अशाप्रकारच्या खेळातून आपले अंगी असलेले क्रीडा कौशल्य दाखविण्यास मदत होते असे मत त्यांनी यावेळी व्यक्त केले.

        प्रास्ताविकातून पोलीस अधीक्षक डॉ.भूजबळ म्हणाले, प्रत्येक क्रीडा स्पर्धेत खेळाडूने सहभाग घेतला. अत्यंत खेळीमेळीच्या वातावरणात क्रीडा स्पर्धा पार पडल्या. या स्पर्धेतून पोलीस अधिकारी व कर्मचाऱ्यांनी खिलाडू वृत्तीचा परिचय दिला. चंद्रपूर येथे होणाऱ्या परिक्षेत्रीय क्रीडा स्पर्धेत निश्चित चांगली कामगीरी बजावतील असा विश्वास त्यांनी व्यक्त केला.

        यावेळी सांघिक खेळाचे विजेता व उपविजेता संघांना पाहुण्यांचे हस्ते बक्षीस वितरण करण्यात आले. यामध्ये फुटबॉल (पुरुष) प्रथम- पोलीस मुख्यालय गोंदिया, द्वितीय- तिरोडा विभाग. हँडबॉल (पुरुष) प्रथम- देवरी विभाग, द्वितीय- आमगाव विभाग, व्हॉलीबॉल (पुरुष) प्रथम- पोलीस मुख्यालय गोंदिया, द्वितीय- आमगाव विभाग, व्हॉलीबॉल (महिला) प्रथम- गोंदिया विभाग, द्वितीय- पोलीस मुख्यालय, बास्केटबॉल (पुरुष) प्रथम- देवरी विभाग, द्वितीय- आमगाव विभाग. बास्केटबॉल (महिला) प्रथम- गोंदिया विभाग, द्वितीय- पोलीस मुख्यालय. कबड्डी (पुरुष) प्रथम- आमगाव विभाग, द्वितीय- देवरी विभाग. कबड्डी (महिला) प्रथम- पोलीस मुख्यालय, द्वितीय- गोंदिया विभाग. खो-खो (पुरुष) प्रथम- तिरोडा विभाग, द्वितीय- आमगाव विभाग, खो-खो (महिला) प्रथम- पोलीस मुख्यालय, द्वितीय- गोंदिया विभाग. हॉकी (पुरुष) प्रथम- देवरी विभाग, द्वितीय- पोलीस मुख्यालय. उत्कृष्ट धावपटू (महिला) ज्योती बांते- पोलीस मुख्यालय गोंदिया, उत्कृष्ट धावपटू (पुरुष) हिमेश भुजाडे- तिरोडा विभाग. सर्वसाधारण विजेतेपद (महिला) पोलीस मुख्यालय, सर्वसाधारण विजेतेपद (पुरुष) देवरी विभाग यांना देण्यात आले. संगीत खुर्ची स्पर्धेत कविता शेडमासे- प्रथम, निलीमा पवार- द्वितीय, भुमेश्वरी सोनवाने- तृतीय यांना पुरस्काराने गौरविण्यात आले. यावेळी अधिकारी व निमंत्रीतामध्ये रस्सीखेच स्पर्धा घेण्यात आली. अधिकारी संघाने यामध्ये बाजी मारली. पोलीस बँड पथकाने सुरेख धुन वाजविली.

       कार्यक्रमाला पोलीस विभागाचे अधिकारी, कर्मचारी, त्यांचे पारिवारीक सदस्य तसेच खेळाडू मोठ्या संख्येने उपस्थित होते. कार्यक्रमाचे संचालन मंजुश्री देशपांडे यांनी केले. उपस्थितांचे आभार अपर पोलीस अधीक्षक डॉ.संदीप पखाले यांनी मानले.

                                                                        00000