जिल्हा माहिती कार्यालय, नविन प्रशासकीय इमारत, दुसरा माळा, खोली क्र.25, जयस्तंभ चौक, गोंदिया- 441601


Friday, 21 June 2019

तणावमुक्त जीवन जगण्यासाठी योगसाधना आवश्यक - डॉ.कादंबरी बलकवडे

                        आंतरराष्ट्रीय योग दिन उत्साहात साजरा



       योगसाधना ही भारताने संपूर्ण जगाला आणि मानवतावादाला दिलेली सर्वात मोठी देणगी आहे. प्रत्येक व्यक्तीच्या जीवनात योगास अनन्यसाधारण महत्व आहे. सुदृढ शरीर, मन आणि निरोगी आरोग्यासाठी योग हा उत्तम पर्याय असल्याचे दिसून आले आहे. त्यामुळे तणावमुक्त जीवन जगण्यासाठी प्रत्येकाने योगसाधना करणे आवश्यक आहे. असे प्रतिपादन जिल्हाधिकारी डॉ.कादंबरी बलकवडे यांनी केले.
         आज 21 जून रोजी इंदिरा गांधी स्टेडियम गोंदिया येथे आयोजित आंतरराष्ट्रीय योग दिन कार्यक्रमात डॉ.बलकवडे बोलत होत्या. यावेळी जि.प.अध्यक्ष सीमा मडावी, जि.प.मुख्य कार्यकारी अधिकारी डॉ.राजा दयानिधी यांची प्रामुख्याने उपस्थिती होती.
         डॉ.बलकवडे पुढे म्हणाल्या, आजची आपली जीवनशैली पूर्णपणे बदलेली आहे. कामाच्या वेळा, खाण्याच्या सवयी, कामाचा ताण, झोपेची कमतरता या सर्वांमुळे आज प्रत्येकाला तणावाला सामोरे जावे लागते. त्यामुळे तणावमुक्त राहण्यासाठी आपण सर्वांनी आपल्या जीवनशैलीमध्ये योगसाधनेचा समावेश करणे आवश्यक आहे. योग हा फक्त व्यायाम नसून योगामुळे शारिरीक, मानसिक आणि भावनिक आरोग्य सुदृढ राहते. नियमीत योगासने केल्याने शरीराला ऊर्जा प्राप्त होत असते. योगामुळे मनशांती तर मिळतेच शिवाय तणाव दूर होवून एकाग्रता सुध्दा वाढण्यास मदत होते. त्यामुळे प्रत्येकाने निरोगी आयुष्य जगण्यासाठी योगसाधना करणे आवश्यक असल्याचे त्यांनी सांगितले.
         आर्ट ऑफ लिव्हींगचे मुख्य प्रशिक्षक विकास देशपांडे यांनी नगर योग उत्सव समिती तर्फे उपस्थितांकडून वृक्षासन, अर्ध वृक्षासन, पूर्ण वृक्षासन, पादहस्तासन, अर्ध चक्रासन, त्रिकोणासन, भद्रासन, दंडासन, वज्रासन, शसकासन, उत्तान मंडूकासन, उत्तान उर्ध्वमुस्कासन, उत्तान पादासन, मरिचासन, मक्रासन, भूजंगासन, शलभासन, सेतू बंधासन, जगदीस्पादासन, अर्धांगासन, पवन मुक्तासन, शवासन, नाडी शोधन प्राणायम, शितल प्राणायम, भ्रामरी प्राणायम, पदमासन, अर्ध पदमासन व सुकासन इत्यादी योगासनाचे उपस्थितांकडून प्रात्यक्षिके करवून घेतली.
       कार्यक्रमास माजी खासदार डॉ.खुशाल बोपचे, जि.प.अतिरिक्त मुख्य कार्यकारी अधिकारी श्री.हाश्मी, जिल्हा क्रीडा अधिकारी सुभाष गांगरेड्डीवार, लेखाधिकारी एल.एच.बावीस्कर, जिल्हा आपत्ती व्यवस्थापन अधिकारी राजन चौबे, माजी जि.प.उपाध्यक्ष विनोद अग्रवाल यांचेसह पतंजली योग समिती, योग मित्र मंडळ, आरोग्य भारती, आर्ट ऑफ लिव्हींग, अखिल विश्व गायत्री परिवार, ब्रम्हाकुमारीज ईश्वरीय विश्व विद्यालय, नेहरु युवा केंद्र, रामकृष्ण सत्संग मंडळ, श्री रामचंद्र मिशन हार्टफुलनेस इन्स्टीट्यूट आदी सामाजिक संघटनेचे पदाधिकारी उपस्थित होते.
        कार्यक्रमाचे संचालन नागेश गौतम यांनी केले. उपस्थितांचे आभार डॉ.प्रशांत कटरे यांनी मानले. यावेळी शाळा-महाविद्यालयातील विद्यार्थी, पालक, ज्येष्ठ नागरिक, नागरिक, महिला, शासकीय अधिकारी-कर्मचारी बहुसंख्येने उपस्थित होते.

Saturday, 15 June 2019

पालक सचिव डॉ.मुखर्जी यांची वैद्यकीय महाविद्यालय व केटीएस जिल्हा सामान्य रुग्णालयाला भेट



     जिल्ह्याचे पालक सचिव तथा वैद्यकीय शिक्षण सचिव डॉ.संजय मुखर्जी यांनी आज 15 जून रोजी येथील शासकीय वैद्यकीय महाविद्यालयात आणि केटीएस जिल्हा सामान्य रुग्णालयाला भेट देवून पाहणी केली. यावेळी त्यांच्यासमवेत जिल्हाधिकारी डॉ.कादंबरी बलकवडे, जि.प.मुख्य कार्यकारी अधिकारी डॉ.राजा दयानिधी, वैद्यकीय  शिक्षण संचालक पी.टी.वाकोडे, अपर जिल्हाधिकारी अशोक लटारे, शासकीय वैद्यकीय महाविद्यालयाचे अधिष्ठाता डॉ.विनायक रुखमोडे यांची उपस्थिती होती.
        डॉ.मुखर्जी यांनी केटीएस जिल्हा सामान्य रुग्णालयात असलेल्या सिटी स्कॅन मशीन विभागाला भेट देवून पाहणी केली व नविन येणारे सिटी स्कॅन मशीन नविन इमारतीत लावण्याच्या सूचना त्यांनी यावेळी केल्या. शासकीय वैद्यकीय महाविद्यालयात नव्यानेच बांधण्यात आलेल्या विद्यार्थी वर्ग व वाचन कक्षाची त्यांनी पाहणी करुन काही उपयुक्त सूचना केल्या. अतिदक्षता विभाग, टेलिमेडिसीन विभाग, दंतचिकित्सा विभाग, डायलेसीस विभाग, बाह्यरुग्ण विभाग, आंतररुग्ण विभागाच्या वार्ड 1 व 2 ला भेट देवून रुग्णांशी संवाद साधला. तसेच येथील कार्यरत असलेल्या वैद्यकीय अधिकारी व कर्मचाऱ्यांना निर्देश देवून रुग्णांना चांगल्याप्रकारची वैद्यकीय सेवा पुरविण्यात यावे असे सांगितले.
         बाई गंगाबाई शासकीय स्त्री रुग्णालयाला भेट देवून परिसराची पाहणी करुन पावसाळ्याच्या दिवसात पाण्याचा निचरा योग्यप्रकारे करण्यात यावा यासाठी 2 अतिरिक्त मोटरपंप लावण्याचे निर्देश त्यांनी दिले. त्यामुळे वार्डामध्ये पावसाळ्यात पाणी जाणार नाही व रुग्णांचे हाल होणार नाही असे त्यांनी यावेळी सांगितले.
        प्रत्येक बुधवारी प्रत्यक्ष मुलाखतीतून सहायक प्राध्यापक व निवासी डॉक्टरांची पदे भरण्यात येतात. परंतू या मुलाखतीला पाहिजे तसा प्रतिसाद मिळत नसल्याची बाब अधिष्ठाता डॉ.रुखमोडे यांनी सांगितली. बधिरीकरणशास्त्र विभागात 4 डॉक्टरांची पदे भरण्याची विनंती त्यांनी सचिवांना केली. याबाबत लवकरच निर्णय घेवून पदभरती करण्यात येईल व स्थानिक पातळीवर सुध्दा भरती प्रक्रिया राबवावी अशी सूचना डॉ.मुखर्जी यांनी अधिष्ठाता डॉ.रुखमोडे यांना केली. यावेळी शासकीय वैद्यकीय महाविद्यालयातील विविध विभाग प्रमुख, सहायक प्राध्यापक, वैद्यकीय अधिकारी तसेच कर्मचारी उपस्थित होते.

पाणीटंचाईच्या उपाययोजनांसोबत अन्य कामे वेळेत पूर्ण करा - डॉ.संजय मुखर्जी



जिल्ह्यातील पाणीटंचाईवर मात करण्यासाठी संबंधित यंत्रणांनी योग्य नियोजन करुन आवश्यक त्या उपाययोजना कराव्यात. जिल्ह्याच्या विकासासाठी करण्यात येत असलेली कामे यंत्रणांनी समन्वयातून वेळीच पूर्ण करावीत. असे निर्देश पालक सविच डॉ.संजय मुखर्जी यांनी दिले.
        आज 15 जून रोजी जिल्ह्याच्या पाणीटंचाई स्थितीचा आणि अन्‍य योजनांचा आढावा पालक सचिव डॉ.मुखर्जी यांनी जिल्हा नियोजन समितीच्या सभागृहात आयोजित बैठकीत घेतला, यावेळी ते बोलत होते. बैठकीला जिल्हाधिकारी डॉ.कादंबरी बलकवडे, जि.प.मुख्‍य कार्यकारी अधिकारी डॉ.राजा दयानिधी, उपवनसंरक्षक एस. युवराज, अपर जिल्हाधिकारी अशोक लटारे, अतिरिक्त मुख्य कार्यकारी अधिकारी श्री. हाश्मी, अपर पोलीस अधीक्षक संदिप आटोळे यांची प्रमुख उपस्थिती होती.
        डॉ.मुखर्जी म्हणाले, पाणीटंचाईवर मात करण्यासाठी गाव पातळीवर कसे नियोजन करता येईल यादृष्टीने काम केले पाहिजे. जिल्हा परिषदेने टंचाईवर मात करण्यासाठी आवश्यक निधी ग्रामपंचायतींना उपलब्ध करुन दिला पाहिजे. नागरिकांना दुषित पाण्याचा पुरवठा होणार नाही याची दक्षता घेतली पाहिजे. ज्या प्रकल्पातून पाणीपुरवठा करण्यात येतो तो पाणीपुरवठा योजनांच्या जलस्त्रोतांपर्यंत आवश्यक त्या वेळेत पोहोचला पाहिजे याचे देखील नियोजन झाले पाहिजे असे ते म्हणाले.
         जिल्ह्याच्या विकासाच्या दृष्टीने जिल्हा वार्षिक योजना अत्यंत महत्वपूर्ण असल्याचे सांगून डॉ.मुखर्जी म्हणाले, या योजनांच्या माध्यमातून मिळणारा निधी विविध यंत्रणांनी निर्धारीत वेळेत खर्च करावा. तो समर्पित करण्याची वेळ येवू नये. शासन स्तरावर निधी मिळण्याबाबत काही अडचणी असल्यास त्याबाबत अवगत करुन दयावे. त्यामुळे तो निधी वेळेत मिळविता येईल. शेतकऱ्यांसाठी महत्वाची असलेली प्रधानमंत्री शेतकरी सन्मान योजनेचा लाभ जिल्ह्यातील पात्र लाभार्थ्यांना वेळेत देवून त्यांना मदत करावी. जलयुक्त शिवार अभियानाची कामे यंत्रणांनी 30 जून पुर्वी पूर्ण करावी. जी कामे मजुरांअभावी प्रलंबीत आहेत तेथे तहसिलदारांनी लक्ष घालून मजूर उपलब्ध करुन देण्याची कार्यवाही करावी. तसेच या अभियानासाठी देण्यात येणाऱ्या विशेष निधीची कामे सुध्दा वेळेत पूर्ण करावी असे ते म्हणाले.
         राष्ट्रीयकृत बँका पीक कर्ज वाटपात उदासीन दिसत असल्याचे सांगून डॉ.मुखर्जी म्हणाले, राष्ट्रीयकृत बँका, ग्रामीण बँक आणि जिल्हा मध्यवर्ती सहकारी बँकांच्या शाखांनी मागणी केलेल्या शेतकऱ्यांना वेळीच कर्ज उपलब्ध करुन दयावे. पर्यावरणाच्या दृष्टीने महत्वपूर्ण असलेल्या 33 कोटी वृक्ष लागवडीत विविध यंत्रणांनी पुढाकार घेवून देण्यात आलेले वृक्ष लागवडीचे उद्दिष्ट पूर्ण करावी. रोजगार हमी योजनेच्या कामांची ज्या गावातील मजुरांकडून मागणी करण्यात येईल त्यांना गाव व परिसरात रोजगार उपलब्ध करुन देण्याची कार्यवाही यंत्रणांनी करावी असे त्यांनी सांगितले.
        जिल्हाधिकारी डॉ.बलकवडे यांनी जिल्ह्यातील ज्या गावांना व शहरांना पाणीटंचाई जाणवत आहे त्या टंचाईच्या निवारणार्थ करण्यात येत असलेल्या उपाययोजनांची व विविध योजनांच्या प्रगतीबाबतची माहिती यावेळी डॉ.मुखर्जी यांना दिली.                                               ग्रामीण भागातील पाणीटंचाईच्या निवारणार्थ टप्पा 1, 2, 3 अंतर्गत नविन विंधन विहिरींची 79 कामे, विंधन विहिर विशेष दुरुस्तीची 876 कामे आणि एक सार्वजनिक विहिर पाण्यासाठी अधिग्रहीत करण्यात आली. सौर ऊर्जेवर आधारित दुहेरी पंप लघु नळ योजनेअंतर्गत 20 कामे करण्यात आली असून संभाव्य पाणीटंचाईग्रस्त गावांची/वाड्यांची संख्या 409 आहे. स्थानिक विकास निधी अंतर्गत 136 विंधन विहिरीच्या खोदकामांना मान्यता मिळाली असून 127 कामे पूर्ण झाल्याची  माहिती ग्रामीण पाणीपुरवठा विभागाचे कार्यकारी अभियंता श्री.चव्हाण यांनी दिली.
        गोंदिया शहराला दररोज एकवेळा दरडोई 100 लिटर पाणीपुरवठा करण्यात येतो. गोंदिया शहरासाठी पुजारीटोला धरणातून सोडण्यात आलेले पाणी डांगुर्ली येथे वैनगंगा नदीत येवून येथून हे पाणी योजनेच्या पाईप लाईनद्वारे गोंदिया शहराला पुरविण्यात येते. आमगाव येथे टंचाई असलेल्या भागात 2 टँकरद्वारे पाणीपुरवठा करण्यात येते. तर गोरेगाव येथे नव्याने 14 विंधन विहिरी तयार करण्यात आल्यामुळे पाणी टंचाईवर मात करण्यात आल्याचे नगरपालिका प्रशासन अधिकारी श्री.जाधव यांनी सांगितले.
        जिल्हा वार्षिक योजना सन 2018-19 या वर्षात 146 कोटी 10 लक्ष रुपये नियतव्यय मंजूर होता, त्यापैकी 143 कोटी 13 लक्ष निधीचे वितरण करण्यात येवून शंभर टक्के खर्च करण्यात आला. सन 2019-20 या वर्षात 170 कोटी नियतव्यय मंजूर असून तेवढाच निधी अर्थसंकल्पीत झाला आहे. त्यापैकी 55 कोटी 64 लक्ष रुपये निधी प्राप्त झाल्याची माहिती सहायक जिल्हा नियोजन अधिकारी श्री.भिमटे यांनी दिली.
        प्रधानमंत्री शेतकरी सन्मान योजनेत जिल्ह्यातील 1 लाख 69 हजार 465 शेतकरी पात्र ठरले. त्यापैकी 1 लाख 7 हजार 172 शेतकऱ्यांची  नावे पोर्टलवर अपलोड करण्यात आली आहे. 13 जूनच्या पत्रानुसार नविन लाभार्थ्यांची माहिती संकलीत करण्याचे काम सुरु आहे. जिल्ह्यातील टंचाईच्या भागातील शेतकऱ्यांना 8 प्रकारच्या सुविधा देण्यात आल्याची माहिती निवासी उपजिल्हाधिकारी श्री.धार्मिक यांनी दिली.
       जलयुक्त शिवार अभियानात सन 2016-17 ते 2018-19 या कालावधीत जिल्ह्यातील 305 गावांची निवड करण्यात आली. यापैकी 282 गावे वॉटर न्युट्रल झाली आहे. तर 1 लाख 18 हजार 537 हेक्टर सिंचन क्षेत्र निर्माण झाले. सन 2018-19 या वर्षात विविध विभागामार्फत सुरु असलेल्या 2892 कामांपैकी 2597 कामे पूर्ण करण्यात आल्याची  माहिती जिल्हा अधीक्षक कृषि अधिकारी श्री.नायनवाड यांनी दिली.
        सन 2019-20 या वर्षाच्या खरीप व रब्बी हंगामात 31 मे पर्यंत जिल्हा मध्यवर्ती सहकारी बँक, राष्ट्रीयकृत बँका व ग्रामीण बँकांनी 21 हजार 780 शेतकऱ्यांना 86 कोटी रुपयाचे कर्ज वाटप करण्यात आले आहे. 230 कोटी वाटपाचे यावर्षी उद्दिष्ट देण्यात आल्याची माहिती जिल्हा अग्रणी प्रबंधक श्री.सिल्हारे यांनी दिली.
       33 कोटी वृक्ष लागवड कार्यक्रमाअंतर्गत सन 2019 च्या पावसाळ्यात जिल्ह्यातील विविध यंत्रणांना 78 लाख 88 हजार वृक्षलागवडीचे उद्दिष्ट देण्यात आल्याची माहिती उपवनसंरक्षक एस.युवराज यांनी दिली.
        आढावा सभेला विविध यंत्रणांचे जिल्हा प्रमुख, तहसिलदार, गटविकास अधिकारी, तसेच संबंधित अधिकारी उपस्थित होते. कार्यक्रमाचे संचालन लेखाधिकारी एल.एच.बाविस्कर यांनी केले. उपस्थितांचे आभार निवासी उपजिल्हाधिकारी हरिश धार्मिक यांनी मानले.

Tuesday, 11 June 2019

गोंदिया जिल्ह्यातील वनहक्क जमिनीचे दावे पंधरा दिवसात निकाली काढा - राजकुमार बडोले


गोंदिया जिल्ह्यातील वन हक्क जमिनीचे दावे येत्या पंधरा दिवसात निकाली काढा असे स्पष्ट निर्देश पालकमंत्री राजकुमार बडोले यांनी आज 11 जून रोजी संबंधित विभागाला दिले.
अनुसूचित जमाती व इतर पारंपारिक वन निवासी अधिनियमांतर्गत वन हक्क जमिनीवर दावा केलेल्या प्रकरणांची आढावा बैठक आज 11 जून रोजी मंत्रालयात आयोजित करण्यात आली होती, त्यावेळी त्यांनी उपरोक्त निर्देश दिले.
श्री. बडोले पुढे म्हणाले, गोंदिया जिल्हास्तरीय वनहक्क समितीकडे प्रलंबित असलेले 506 आणि उपविभागीय पातळीवर असलेले 28 दावे येत्या पंधरा दिवसात निकाली काढावेत. याशिवाय ज्या कास्तकारांनी अपिल दाखल केले नाही, त्यांनाही तातडीने अपिल दाखल करावयास सांगावे तसेच नामंजूर करण्यात आलेले दावे विशेष मोहिम घेऊन निकाली काढावेत. त्यासाठी जुलै अखेरपर्यंत मुदतवाढ देण्यात यावी. त्यानंतर ऑगस्ट महिन्याच्या पहिल्या आठवड्यात यासंबंधिचा आढावा घेण्यात यावा असेही श्री. बडोले यांनी सांगितले.
ज्यांना वन जमिनीचे पट्टे मिळाले त्यांना कर्जमाफी, पीक कर्ज, विहीर, सोसायटीचे कर्ज अशा कोणत्याही योजनांचा लाभ मिळत नाही. त्यामुळे या शेतकऱ्यांना विकासाच्या मुख्य प्रवाहापासून वंचित रहावे लागते. इनाम जमिनी प्राप्त झालेल्या शेतकऱ्यांना ज्या प्रकारे सर्व शासकिय योजनांचा लाभ मिळतो त्याप्रमाणेच गोंदिया जिल्ह्यातील वन हक्क जमिनीप्राप्त आदिवासी शेतकऱ्यांना लाभ मिळावा यासाठी स्वतंत्र परिपत्रक आदिवासी विभागाने निर्गमित करावे, असेही निर्देश श्री. बडोले यांनी दिले.
यावेळी वन विभागाचे प्रधान सचिव विकास खारगे, आदिवासी विभागाचे उपसचिव सुनिल पाटील, मुख्य वनसंरक्षक श्री. तिवारी, गोंदियाचे उपवनसंरक्षक  एस. युवराज, अप्पर प्रधान मुख्य संरक्षक, जलसंपदा विभागाचे कार्यकारी अभियंता श्री. गेडाम आदी अधिकारी उपस्थित होते.

Friday, 31 May 2019

पाणी टंचाईवर प्रत्यक्ष कृतीतून मात करा - राजकुमार बडोले

पाणी टंचाई आढावा सभा


उन्हाळ्याच्या दिवसात जिल्ह्यातील नागरिकांना पिण्याच्या पाण्यासाठी भटकंती करण्याची वेळ येवू नये यासाठी जलस्त्रोतांचे बळकटीकरण करण्यात यावे. आवश्यक त्या ठिकाणी विंधन विहिरीची कामे, विंधन विहिरी दुरुस्तीची कामे, सार्वजनिक विहिरीतील गाळ काढण्याची कामे आणि आवश्यक त्या विंधन विहिरीमध्ये पुरक पाईप टाकावे. पाणी टंचाईवर मात करण्यासाठी ही सर्व कामे प्रत्यक्ष कृतीतून यंत्रणांनी करावी. असे निर्देश पालकमंत्री राजकुमार बडोले यांनी दिले.
       आज 31 मे रोजी पवार बोर्डींग गोंदिया येथे जिल्ह्यातील पाणी टंचाईचा आढावा घेतांना श्री.बडोले बोलत होते. यावेळी जि.प.अध्यक्ष सीमा मडावी, आमदार विजय रहांगडाले, संजय पुराम, प्रभारी जिल्हाधिकारी अशोक लटारे, जि.प.मुख्य कार्यकारी अधिकारी डॉ.राजा दयानिधी, उपाध्यक्ष हाजी अलताफ हमीद, जि.प.कृषि व पशुसंवर्धन समिती सभापती शैलजा सोनवाने, महिला व बाल कल्याण समिती सभापती लता दोनोडे, शिक्षण व आरोग्य समिती सभापती रमेश अंबुले, समाज कल्याण समिती सभापती विश्वजीत डोंगरे, अर्जुनी/मोरगाव पं.स.सभापती अरविंद शिवणकर, सडक/अर्जुनी पं.स.सभापती गिरीधारी हत्तीमारे, गोंदिया पं.स.सभापती माधुरी हरिणखेडे, देवरी पं.स.सभापती सुनंदा बहेकार, गोरेगाव नगराध्यक्ष आशिष बारेवार यांची प्रमुख उपस्थिती होती.
         पालकमंत्री बडोले पुढे म्हणाले, पाणी टंचाईबाबत अनेक ग्रामपंचायतीच्या व गावाच्या अडचणी आहेत. गावाच्या विकासाच्या दृष्टीने ग्रामपंचायतींना 14 व्या वित्त आयोगातून निधी देण्यात येत आहे. ग्रामपंचायतींनी स्वत: पुढाकार घेवून पाणी टंचाईवर मात करण्यासाठी पुढे आले पाहिजे. पाणी टंचाईवर मात करण्यासाठी ज्या उपाययोजना सूचविण्यात आल्या आहेत त्या प्रत्यक्षात अंमलात आल्या पाहिजे. एप्रिल ते जून हे महिने पाणी टंचाईचे आहेत. पंचायत समितींनी आपल्या स्तरावर उपाययोजना करण्याबाबत जी कामे सूचविण्यात आली आहेत त्याची अद्याप अंमलबजावणी झाली नसेल तर ही बाब गंभीर आहे असे सांगितले.
        ज्या पाणी पुरवठा योजना वीज जोडणी अभावी बंद आहेत त्या योजनांना पाणी टंचाईची तीव्रता लक्षात घेता तातडीने वीज जोडणी करण्यात यावी असे सांगून श्री.बडोले म्हणाले, जे पाण्याचे स्त्रोत आटले आहेत त्याची तपासणी करण्यात यावी. योग्य तेथे पाण्याचे स्त्रोत निर्माण करावे यासाठी निधीची अडचण नाही. ज्या ठिकाणी विंधन विहिरी करण्यात आल्या आहेत त्यावर त्वरित हँडपंप बसविण्यात यावे. या कामात दिरंगाई होवू नये. जिल्ह्यातील सार्वजनिक विहिरीतील गाळ काढण्याचा कालबध्द कार्यक्रम ग्रामपंचायतीने राबवावा, त्यामुळे पाणी साठा उपलब्ध होण्यास मदत होईल. जेथे विहिर अधिग्रहणाची आवश्यकता आहे तेथे विहिर अधिग्रहीत करुन संबंधित गावाला पाणी पुरवठा करण्याची व्यवस्था करावी. ज्या नादुरुस्त विंधन विहिरी आहेत त्यांची तातडीने दुरुस्ती करावी असे त्यांनी सांगितले.
        श्री.बडोले पुढे म्हणाले, जिल्ह्यात महाराष्ट्र जीवन प्राधिकरण विभागाच्या ज्या योजना बंद आहेत त्या तातडीने सुरु करण्यासाठी शासनाकडे प्रस्ताव पाठवून दुरुस्तीसाठी निधीची मागणी करावी त्यासाठी शासन निधी देण्यास तयार आहे. हया योजना तातडीने दुरुस्ती करुन ग्रामस्थांना पिण्याचे पाणी उपलब्ध करुन दयावे असे ते यावेळी म्हणाले.                                                                
         आमदार श्री.रहांगडाले म्हणाले, गोरेगाव आणि तिरोडा तालुक्यातील ज्या गावामध्ये पाणी टंचाई भासत आहे त्या गावाला तहसिलदार आणि गटविकास अधिकारी यांनी भेट देवून संबंधित ग्रामस्थांचे म्हणणे ऐकून घेवून पाण्याची व्यवस्था करावी.
         आमदार श्री.पुराम म्हणाले, सालेकसा, देवरी व आमगाव तालुक्यातील काही गावांना पाण्याचा प्रश्न भेडसावतो आहे. यावर मात करण्यासाठी ग्रामस्थांना विश्वासात घेवून पाण्याची उपलब्धता करुन दयावी असे सांगितले.
        यावेळी जि.प.सदस्य गंगाधर परशुरामकर, किशोर तरोणे यांचेसह अन्य लोकप्रतिनिधींनी आपल्या क्षेत्रातील पाणी टंचाईच्या समस्या आढावा बैठकीत मांडल्या.
        ग्रामीण पाणी पुरवठा विभागाचे प्रभारी कार्यकारी अभियंता श्री.चव्हाण यांनी पाणी टंचाई निवारणार्थ करण्यात आलेल्या उपाययोजनांची माहिती दिली. जानेवारी ते मार्च 2019 या कालावधीत पाणी टंचाई कृती आराखडा टप्पा-2 अंतर्गत जिल्ह्यात 123 गावांमध्ये संभाव्य पाणी टंचाई असून यावर मात करण्यासाठी 272 उपाययोजना करण्यात येत आहे. नव्याने 39 नविन विंधन विहिरी तयार करण्यात आल्या आहेत. 220 विंधन विहिरीच्या हातपंपाची दुरुस्ती करण्यात आली आहे. टप्पा-3 अंतर्गत एप्रिल ते जून 2019 या कालावधीत 153 गावांमध्ये संभाव्य पाणी टंचाई असून यावर मात करण्यासाठी 1540 उपाययोजना प्रस्तावित असल्याचे श्री.चव्हाण यांनी सांगितले.
        माहे जानेवारी ते मे 2019 या कालावधीत लघु नळ पाणी पुरवठा योजनेअंतर्गत 22 विद्युत पंप दुरुस्ती व आश्रम शाळेअंतर्गत 6 असे एकूण 28 विद्युत पंप दुरुस्ती करण्यात आली आहे. तसेच प्रादेशिक नळ पाणी पुरवठा योजनेअंतर्गत 2 योजना दुरुस्त करण्यात आल्या आहे तर सौर ऊर्जेवर आधारित दुहेरी पंप लघु नळ योजनेअंतर्गत 20 कामे पूर्ण करण्यात आली आहे. टंचाई कालावधीत एकूण 1182 पैकी 596 विंधन विहिरींची दुरुस्ती करण्यात आली असून 586 दुरुस्तीची कामे प्रगतीपथावर आहे. स्थानिक विकास निधी अंतर्गत 127 विंधन विहिरींची कामे पूर्ण करण्यात आली आहे. जिल्ह्यातील आठ पंचायत समितीला पाणी टंचाई अंतर्गत देखभाल दुरुस्तीसाठी 2696 जीआय पाईपचे वाटप करण्यात आल्याचे श्री.चव्हाण यांनी सांगितले.
       सभेला निवासी उपजिल्हाधिकारी, उपजिल्हाधिकारी, उपविभागीय अधिकारी, उपमुख्य कार्यकारी अधिकारी, सर्व तहसिलदार, सर्व गटविकास अधिकारी, जि.प.सदस्य गंगाधर परशुरामकर, रचना गहाणे, किशोर तरोणे, शिला चव्हाण, श्रीमती तिराले, श्रीमती पाथोडे यांचेसह अन्य जि.प.सदस्य, पं.स.सदस्य, जिल्ह्यातील ग्रामपंचायतीचे सरपंच, नगरपालिका-नगरपंचायत मुख्याधिकारी, पाणी टंचाई निवारणार्थ संबंधित यंत्रणांचे प्रमुख अधिकारी यावेळी उपस्थित होते. यावेळी विविध जि.प.सदस्य, पं.स.सदस्य व ग्रामपंचायत सरपंचांनी त्यांच्या क्षेत्रातील व गावातील पाणी टंचाईच्या समस्या मांडल्या.

शेतकऱ्यांच्या समृध्दीचे नियोजन करा - पालकमंत्री बडोले

खरीप हंगामपूर्व आढावा सभा
शासनाच्या कृषिविषयक योजनांच्या माध्यमातून जिल्ह्यातील शेतकऱ्यांचे जीवनमान उंचावले पाहिजे. पीक कर्जाची मागणी करणाऱ्या प्रत्येक शेतकऱ्याला कर्ज पुरवठा झाला पाहिजे. बोगस बियाणे, खते व किटकनाशकांचा शेतकऱ्यांना पुरवठा होणार नाही याची दक्षता घेवून जिल्ह्यातील शेतकरी समृध्द कसा होईल यादृष्टीने नियोजन करण्याचे निर्देश पालकमंत्री राजकुमार बडोले यांना दिले.
        आज 31 मे रोजी पवार बोर्डींग गोंदिया येथे खरीप हंगामपूर्व आढावा बैठकीत श्री.बडोले बोलत होते. यावेळी जि.प.अध्यक्ष सीमा मडावी, आमदार विजय रहांगडाले, प्रभारी जिल्हाधिकारी अशोक लटारे, जि.प.मुख्य कार्यकारी अधिकारी डॉ.राजा दयानिधी, जि.प.कृषि व पशुसंवर्धन समिती सभापती शैलजा सोनवाने, महिला व बाल कल्याण समिती सभापती लता दोनोडे, शिक्षण व आरोग्य समिती सभापती रमेश अंबुले, समाज कल्याण समिती सभापती विश्वजीत डोंगरे, जि.प.सदस्य गंगाधर परशुरामकर, किशोर तरोणे यांची प्रमुख उपस्थिती होती.
          श्री.बडोले म्हणाले, ज्या शेतकऱ्यांनी कृषिपंपांना वीज जोडणीसाठी अर्ज केले आहे त्यांना तातडीने वीज पुरवठा करावा. त्यामुळे त्यांना सिंचन करण्यास मदत होईल. जिल्ह्यातील जास्तीत जास्त शेतकरी सौर कृषिपंपाच्या माध्यमातून सिंचन करतील यासाठी सौर कृषिपंप घेण्यास शेतकऱ्यांना प्रोत्साहीत करावे. बोगस बियाणै, खते व किटकनाशके यांना आळा घालण्यासाठी कृषि निविष्ठा केंद्रांची नियमीत काटेकोरपणे तपासणी करावी. नेहमीच्या शेतकऱ्यांना प्रायोगिक तत्वावरील बियाणे मोफत देण्यापेक्षा अन्य शेतकऱ्यांना मोफत बियाणांचा पुरवठा करुन त्याला त्याचा उपयोग होईल यासाठी मदत करावी असे सांगितले.
         फलोत्पादन अभियान जिल्ह्यात प्रभावीपणे राबवून जिल्ह्यातील जास्तीत जास्त शेतकरी फळबागांकडे कसे वळतील याकडे लक्ष दयावे असे सांगून श्री.बडोले म्हणाले, खरीप हंगामात उडीत पिकाचा पेरा वाढला पाहिजे यासाठी शेतकऱ्यांना प्रोत्साहीत करावे. जिल्ह्यातील जास्तीत जास्त शेतकऱ्यांना नगदी पिकाकडे वळविण्यासाठी कृषि विभागाने पुढाकार घ्यावा. जिल्ह्यात असलेल्या हवामान केंद्राच्या माध्यमातून केंद्र परिसरातील शेतकऱ्यांना हवामानाचा अंदाज दिला पाहिजे. छत्रपती शिवाजी महाराज शेतकरी सन्मान योजनेचा लाभ जिल्ह्यातील जास्तीत जास्त शेतकऱ्यांना मिळाला पाहिजे. जे शेतकरी या योजनेत अपात्र ठरले त्यांच्या अपात्रतेमधील त्रुटी दूर करुन ते पात्र ठरवून त्यांना या योजनेचा लाभ देण्याच्या दृष्टीने सहकार विभागाने पुढाकार घ्यावा असे सांगितले.
        राष्ट्रीयकृत बँकांनी शेतकऱ्यांना मोठ्या प्रमाणात पीक कर्ज उपलब्ध करुन दयावे असे सांगून श्री.बडोले म्हणाले, यावेळी केवळ 40 टक्केच शेतकऱ्यांना आतापर्यंत पीक कर्ज पुरवठा करण्यात आला आहे. उर्वरित 60 टक्के शेतकऱ्यांना तातडीने पीक कर्ज पुरवठा करुन त्यांना मदतीचा हात दयावा. जिल्ह्यातील सिंचन क्षेत्र वाढले पाहिजे यासाठी जलसंधारण व जलसंपदा विभागाने नियोजन करावे. त्यामुळे जास्तीत जास्त शेतकऱ्यांच्या उत्पन्नात वाढ होण्यास मदत होईल. धान खरेदी केंद्रावर खरेदी करण्यात आलेल्या धानाची तातडीने उचल करावी. ते उघड्यावर राहून त्याची नासाडी होणार नाही याची दक्षता पणन विभागाने घ्यावी असे त्यांनी यावेळी सांगितले.                                                                                       आमदार श्री.रहांगडाले म्हणाले, प्रात्यक्षिकासाठी काही शेतकऱ्यांना कृषि विभागाने धान मोफत उपलब्ध करुन दयावा. त्यामुळे त्यांना बियाण्यांचा चांगला उपयोग होईल. खरीप हंगामात शेतकऱ्यांना उडीद बियाणे उपलब्ध झाली पाहिजे. बोगस बियाणे, खते व किटकनाशकांच्या माध्यमातून शेतकऱ्यांची फसवणूक होणार नाही याकडे कृषि विभागाने लक्ष दयावे असे त्यांनी सांगितले.
         प्रास्ताविकातून प्रभारी जिल्हा अधीक्षक कृषि अधिकारी नंदकिशोर नायनवाड यांनी सांगितले की, सन 2018-19 मध्ये प्रत्यक्ष पेरणी क्षेत्रात 14 हजार 163 हेक्टरने वाढ झाली आहे. सन 2017-18 या वर्षात अवकाळी पाऊस, गारपीट व वादळी वाऱ्यामुळे शेतपिकांच्या नुकसानीची भरपाई म्हणून अर्जुनी/मोरगाव तालुक्यात 1 कोटी 67 लक्ष व देवरी तालुक्यात 2 लक्ष 18 हजार तर माहे फेब्रुवारी 2018 मध्ये आठ तालुक्यात झालेल्या शेतपिकाच्या नुकसानीसाठी नुकसानग्रस्त शेतकऱ्यांना 2 कोटी 91 लाख 68 हजार रुपये वाटप केले. 43 हजार 21 मे.टन रासायनिक खताचा वापर सन 2018-19 च्या खरीप हंगामात करण्यात आला. सन 2019 च्या खरीप हंगामासाठी महाबीज आणि खाजगी कंपन्यांकडून 62 हजार 836 क्विंटल बियाण्यांची मागणी करण्यात आल्याचे त्यांनी सांगितले.
       सन 2018-19 या वर्षात जिल्ह्यातील 1587 निविष्ठा परवानाधारक केंद्राची खरीप व रब्बी हंगामात तपासणी करण्यात आली. त्यापैकी 60 केंद्रांना अनियमीततेबाबत कारणे दाखवा नोटीस तर 29 केंद्रांना विक्री बंदीचे आदेश व 2 केंद्राचे परवाने निलंबीत करण्यात आले. सन 2019-20 या वर्षाकरीता जिल्ह्यातील सर्व राष्ट्रीयकृत बँकांना 230 कोटी रुपये पीक कर्ज वाटपाचे उद्दिष्ट दिले असल्याचे श्री.नायनवाड यांनी सांगितले.
        सन 2018-19 या वर्षात मार्च 2019 अखेर जिल्ह्यातील 595 कृषि पंपांना वीज जोडणी देण्यात आली असून सन 2019-20 या वर्षात 2792 कृषिपंपांना वीज जोडणीचे उद्दिष्ट दिल्याची माहिती वीज वितरण कंपनीचे कार्यकारी अभियंता श्री.बारापात्रे यांनी दिली.
        जिल्ह्यात असलेल्या विविध सिंचन प्रकल्प व अन्य साधनाच्या माध्यमातून 1 लाख 6 हेक्टरवर सिंचन करण्यात आले. तर 2019-20 या वर्षात 1 लाख 21 हजार 196 हेक्टरवर सिंचनाचे नियोजन असल्याची माहिती जलसंपदा विभागाचे कार्यकारी अभियंता श्री.छप्परघरे यांनी दिली.
        जिल्ह्यातील मार्केटींग फेडरेशनचे 57 आणि आदिवासी विकास महामंडळाचे 43 अशा एकूण 100 केंद्रावर सन 2018-19 च्या खरीप हंगामात 85 हजार 683 शेतकऱ्यांनी 27 लाख 49 हजार 879 क्विंटल धानाची खरेदी केली असून या धानाची किंमत 474 कोटी 57 लक्ष रुपये असून संबंधित शेतकऱ्यांच्या खात्यावर धान खरेदीचे पैसे जमा करण्यात आल्याची माहिती जिल्हा पणन अधिकारी श्री.खर्चे यांनी दिली.
        यावेळी तालुका कृषि अधिकारी मंगेश वावधने, श्री.पात्रीकर, श्री.तुमडाम, श्री.तोडसाम यांचेसह अन्य तालुका कृषि अधिकारी, डॉ.पंजाबराव देशमुख कृषि विद्यापीठाच्या कृषि विज्ञान केंद्र हिवराचे कार्यक्रम समन्वयक डॉ.देशमुख, कृषि विज्ञान केंद्र सिंदेवाहीच्या कार्यक्रम समन्वयक डॉ.उषा डोंगरवार, जलसंपदा विभाग, पणन विभाग, पुरवठा विभागाचे अधिकारी उपस्थित होते. उपस्थितांचे आभार तालुका कृषि अधिकारी श्री.तुमडाम यांनी मानले. 

Monday, 20 May 2019

पाणीटंचाईवर मात करण्यासाठी तातडीने उपाययोजना करा - डॉ.कादंबरी बलकवडे

पाणी टंचाई आढावा बैठक

     जिल्ह्यातील ग्रामीण आणि शहरी भागातील नागरिकांना उन्हाळ्याच्या दिवसात पिण्याचे पाणी पुरेशा प्रमाणात उपलब्ध झाले पाहिजे. कोणत्याही नागरिकाला पाण्यापासून वंचित राहण्याची वेळ येवू नये यासाठी संबंधित यंत्रणांनी नियोजनबध्द पध्दतीने पाणी टंचाईवर मात करण्यासाठी तातडीने उपाययोजना कराव्यात. असे निर्देश जिल्हाधिकारी डॉ.कादंबरी बलकवडे यांनी दिले.
       आज 20 मे रोजी जिल्हाधिकारी कार्यालयातील सभागृहात पाणी टंचाईचा आढावा घेतांना डॉ.बलकवडे बोलत होत्या. यावेळी जि.प.मुख्य कार्यकारी अधिकारी डॉ.एम.राजा दयानिधी, निवासी उपजिल्हाधिकारी हरिष धार्मिक, उपजिल्हाधिकारी (रोहयो) सुनील कोरडे यांची प्रमुख उपस्थिती होती.
       डॉ.बलकवडे म्हणाल्या, पाण्याचे जे स्त्रोत आहे त्यामधून नागरिकांना शुध्द व स्वच्छ पाण्याचा पुरवठा झाला पाहिजे. हे स्त्रोत दुरुस्त करुन त्याचे पुर्नजीवन करण्याचे काम तातडीने हाती घ्यावे. आवश्यक त्या वाड्या-वस्त्या आणि वार्डामध्ये पाण्यासाठी पाईप लाईन टाकण्याचे काम त्वरित करावे. गोंदिया शहरातील दलित वस्तीमध्ये पिण्याचे पाणी उपलब्ध होत नसल्याच्या तक्रारी आहे, तेव्हा नगर परिषदेने पुढाकार घेवून तेथील नागरिकांना पिण्याचे पाणी उपलब्ध करुन दयावे. शहरी भागात सर्वांना पाणी मिळावे यासाठी एक महिन्याच्या आत सर्व्हेक्षण करण्यात यावे. सार्वजनिक विहिरी पाण्याच्या दृष्टीने कशा उपयोगात आणता येईल तसेच बंद अथवा नादुरुस्त असलेल्या विंधन विहिरी दुरुस्ती करुन उपयोगात आणण्याचे देखील त्यांनी सूचविले.
        ज्या स्त्रोतातून नागरिकांना पाण्याची उपलब्धता होते त्या स्त्रोताचा परिसर हा नियमीत स्वच्छ ठेवला पाहिजे असे सांगून डॉ.बलकवडे म्हणाल्या, शुध्द आणि स्वच्छ पाणी नागरिकांना मिळाले पाहिजे, हा त्यांचा अधिकार आहे. ज्या यंत्रणांकडे स्त्रोताच्या देखभालीची जबाबदारी सोपविली आहे त्यांनी या कामात हयगय केल्यास संबंधित यंत्रणेच्या जबाबदार अधिकारी व कर्मचाऱ्यावर निलंबनाच्या अप्रिय कारवाईला सामोरे जाण्याची वेळ येईल. भविष्यातील काळात पाणी टंचाईचा प्रश्न गंभीर होणार आहे. यावर मात करण्यासाठी प्रत्येकाने पाण्याचा योग्य आणि काटकसरीने वापर केला पाहिजे. पाण्याच्या पुर्नभरणाबाबत नागरिकांमध्ये जनजागती करुन प्रत्यक्षात त्याची अंमलबजावणी झाली पाहिजे. ज्या ठिकाणी सद्यस्थितीत नाईलाजाने टँकरने पाणी पुरवठा करण्यात येत आहे तेथील पाण्याच्या स्त्रोताचे बळकटीकरण व आवश्यक त्या दुरुस्ती करुन पाणी पुरवठा पुर्ववत सुरु करावा व टँकरने पाणी पुरवठा बंद करावा. पाणी पुरवठा होत असलेल्या सार्वजनिक तसेच घरगुती नळाला टिल्लू पंप लावून जर कुणी पाणी घेत असतील तर अशांचे टिल्लू पंप जप्त करुन संबंधितांवर यंत्रणेने कारवाई करण्याचे निर्देश त्यांनी यावेळी दिले.   
       डॉ.बलकवडे पुढे म्हणाल्या, ज्या स्त्रोतांमधून नागरिकांना पाणी उपलब्ध होते त्यामध्ये ब्लिचींग पावडर पुरेशा प्रमाणात टाकावे. त्यामुळे दुषित पाणी कुणाच्याही पिण्यात येवून त्यांना आजारांचा सामना करण्याची वेळ येणार नाही. ज्या योजना मंजुरीसाठी शासनाकडे पाठवायच्या आहेत त्या तातडीने शासनाने पाठवून मंजूरी मिळवून घ्यावी. मुख्यमंत्री ग्रामीण पेयजल कार्यक्रम आणि राष्ट्रीय ग्रामीण पेयजल योजनेतून ज्या नळ योजना तयार आहेत परंतू वीज जोडणी अभावी   नागरिकांना पाणी मिळत नाही, तेव्हा डिमांड त्वरित भरुन वीज जोडणी करुन घ्यावी, त्यामुळे लवकरच पाणी उपलब्ध होण्यास मदत होईल. जी कामे प्रगतीपथावर आहेत ती तातडीने पूर्ण करुन पाणी पुरवठा सुरु करावा. पाण्याचे नमूने तपासणीसाठी प्रयोगशाळेत पाठवून अहवाल प्राप्त झाल्यानंतर जे पाण्याचे दुषित स्त्रोत आहेत त्याचे निर्जंतुकीकरण करुन ते पाणी वापरण्यायोग्य व पिण्यायोग्य होतील याकडे विशेष लक्ष्य दयावे असे त्यांनी सांगितले.
        मुख्य कार्यकारी अधिकारी डॉ.दयानिधी म्हणाले, जिल्ह्यात विविध ठिकाणी नविन विंधन घेण्याचे 43 प्रस्ताव होते, त्यापैकी 39 प्रस्तावांना मंजूरी मिळाली असून 20 कामे पूर्ण झाली आहे. जिल्ह्यातील 220 विंधन विहिरींची विशेष दुरुस्ती करण्यात आली आहे. टप्पा-3 अंतर्गत 136 नविन विंधन विहिरी घेणे, 962 विंधन विहिरींची विशेष दुरुस्तीची कामे प्रस्तावित आहेत. लघु नळ पाणी पुरवठा योजनेअंतर्गत 22 विद्युत पंप दुरुस्ती व आश्रमशाळेअंतर्गत 6 असे एकूण 28 विद्युत पंप दुरुस्ती करण्यात आली आहे. सौर ऊर्जेवर आधारित दुहेरी पंप लघु नळ योजनेअंतर्गत 20 कामे पूर्ण झाल्याचे त्यांनी सांगितले.
         यावेळी नगरपरिषद, नगरपालिका व नगरपंचायत क्षेत्रात पाणी पुरवठा बाबतची सद्यस्थिती व पाणी टंचाईवर मात करण्यासाठी करण्यात येत असलेल्या उपाययोजनांची माहिती जिल्हा प्रशासन अधिकारी श्री.जाधव यांनी तसेच संबंधित नगरपालिकेच्या मुख्याधिकाऱ्यांनी दिली. ग्रामीण भागातील पाणी टंचाईवर मात करण्यासाठी करण्यात येत असलेल्या उपाययोजनांची माहिती संबंधित गटविकास अधिकाऱ्यांनी दिली. तसेच जलसंधारण विभागाचे कार्यकारी अभियंता श्री.छप्परघरे व महाराष्ट्र जीवन प्राधिकरणचे कार्यकारी अभियंता आर.पी.चंद्रिकापुरे यांनी सुध्दा त्यांच्या विभागामार्फत करण्यात येत असलेल्या उपाययोजनांची माहिती दिली.
        आढावा बैठकीला बाघ इटियाडोहचे कार्यकारी अभियंता एच.वाय.छप्परघरे, महाराष्ट्र जीवन प्राधिकरणचे कार्यकारी अभियंता आर.पी.चंद्रिकापुरे, ग्रामीण पाणी पुरवठा विभागाचे कार्यकारी अभियंता एच.बी.चव्हाण, जिल्हा पशुसंवर्धन उपायुक्त डॉ.आर.बी.शहारे, जिल्हा पशुसंवर्धन अधिकारी डॉ.राजेश वासनिक, गोंदिया नगरपरिषदेचे मुख्याधिकारी चंदन पाटील, तिरोडाचे मुख्याधिकारी विजय देशमुख यांचेसह तहसिलदार, गटविकास अधिकारी, मुख्याधिकारी तसेच संबंधित यंत्रणेचे अधिकारी उपस्थित होते.
00000